Алматы қаласындағы «Әбу Ханифа» медресе-колледжінің 2025 жылғы бітіруші түлектері мемлекеттік емтихан тапсырып, алған білімдерін сынға салды.
Емтихан комиссиясына Қазақстан мұсылмандары діни басқармасының Діни білім және кадр даярлау бөлімі меңгерушісінің орынбасары Серікбол Аршабаев төрағалық етті. Сондай-ақ комиссия құрамында Алматы Орталық мешітінің ұстазы, РАНТ мүшесі Қуаныш Әбішев пен медресе-колледждің ұстазы Алишер Ташбаев болды.
Комиссия төрағасы Серікбол Аршабаев ҚМДБ Төрағасы, Бас мүфти Наурызбай қажы Тағанұлының түлектерге арналған сәлемі мен ізгі тілектерін жеткізді.
Шара барысында «Әбу Ханифа» медресе-колледжінің директоры Құлмұхаммад Махамбет емтихан комиссиясын көпшілікке таныстырып, шәкірттерге сәттілік тіледі. Ол бұл емтиханның түлектердің діни білім жолындағы маңызды кезең екенін атап өтіп, алдағы өмір жолдарына береке мен табыс тіледі.
Емтихан дәстүрлі түрде билет бойынша және комиссия мүшелерінің қосымша ауызша сұрақтары арқылы өткізілді.
