Сұрақ: Жақсылыққа жақсылық ете алмасақ, күнә бола ма?
Жауап: Адамды екі дүниеде де бақытқа жетелейтін жақсы амалдың бірі – жақсылық жасау. Жақсылық жасалған ортада өзара құрмет пен бірлік бекиді, адамдар арасында сенімділік артады, ізгілікке баулиды. Жақсылық міндет санап емес, жүрекпен, ықыласпен Алланың ризашылығы үшін жасалуға тиіс. Адамның істеген жақсылығына орай Алла мол сауапқа бөлейді.
Жақсылыққа жақсылық ету – адамгершілік пен адами қарым-қатынастың маңызды бөлігі. Ал «Жақсылыққа жақсылық ете алмадым, күнәға баттым ба?» деген күдіктен аулақ болғанымыз абзал.
Пайғамбарымыз (с.а.у.) хадисінде: «Егер Менің құлым жақсы амал жасайтынын айтса, онда Мен оған жақсы амалдың жасалғанын жазып қоямын», десе, тағы бір хадисінде: «Жақсылыққа жақсылықпен жауап беріңдер. Істелген жақсылыққа тең жақсылық істей алмаған кісі, жақсылық істеген адамды сыртынан мақтасын. Осылай етсе, рахмет айтқан болады. Жақсылықты жасыру – жақсылықты білмегенге жатады. Өзінде болмаған нәрсені «менде бар» деп мақтанған адам екі қабат киім киген болады» деген. Жақсылыққа жақсылық етіп жете берейік.
Икрам АЙТАЕВ
