Сұрақ: Ислам зираттарды, рухани орындарды зиярат етуге рұқсат бере ме?
Жауап: Ислам діні әдебін сақтап рухани, тарихи орындарға зиярат етуге тыйым салмайды. Қабірді зиярат ету – шариғатта рұқсат етілген, құптарлық іс. Пайғамбарымыз (с.а.у.) алғашқы кезеңде дінге қайшы істер жасаудан сақтандыру үшін қабірге баруға тыйым салған. Кейіннен діни сенім толық қалыптасып, шариғатты тереңнен түсінген уақытта қабірлерді зиярат етуге рұқсат берген.
Пайғамбарымыз (с.а.у.) хадисінде: «Мен бұрын сендерді қабірлерді зиярат етуден тыйған едім, енді оны зиярат етіңдер. Өйткені ол жүректі жұмсартады, көзден жас шығарады, ақыретті еске салады», – деген.
Қазір таңда рухани тарихи орындарға зиярат жасаушылардың саны артып келеді. Зияратшылар тарапынан зиярат етудің әдебі мен мәдениеті сақтала бермейтіні рас. Дәстүрлі Ислам қабір басында түнеуге, мәйіттен пана сұрауға, тауап етуге, т.б. ысырапшылдық амалдардан қайтарады. ҚМДБ зиярат жасау мәдениетін қалыптастыру мақсатында «Зират және зиярат мәдениеті» атты құжатты қабылдап, имамдар тарапынан түсіндіру жұмыстары жүргізілуде.
Рухани, тарихи орындарға зиярат етіп, марқұмдар үшін Құран аяттарын оқып дұға тілеу – қайырлы іс. Имам Тахауи ақидасының мәтінінде: «Тірілердің өлілер үшін жасаған дұғасында және садақаларында дүниеден өткендер үшін пайда бар», – деген. Рухани тарихи орындарға зиярат етіп, отанға деген сүйіспеншілігіміз арта берсін.
Икрам АЙТАЕВ
