Ішкі істер министрлігі ата-аналар тарапынан жіберілетін, соңы ауыр зардаптарға әкелуі мүмкін бес қателік туралы жазба жариялады.
Соның біріншісі – балаларды қараусыз қалдыру.
«Балаларды қараусыз қалдыру ауыр салдарға әкелуі мүмкін. Мұндай жағдайда туындайтын басты қауіптердің қатарында жол-көлік оқиғалары, балалардың терезеден құлап кетуі, су айдындарында қаза табуы бар. Жыл басынан бері балалардың терезеден құлауына байланысты 50 жағдай тіркелді, оның төртеуі өліммен аяқталған. Көлік қағуы салдарынан 22 бала көз жұмып, 1 386-сы жарақат алған. Одан бөлек, 10 бала суға батып кеткен» деп жазады ІІМ баспасөз қызметі.
Келесі қателік – баланың кіммен араласатынын қадағаламау. Бұл оның жаман ортаға түсуіне себеп болуы мүмкін екенін айтады.
«Ата-ананың немқұрайлылығы жасөспірімдердің күмәнді адамдармен уақыт өткізуіне, құқықбұзушылық жасап, психоактивті заттарды қолданып, девиантты мінез-құлықты көрсетуіне дейін жеткізуі әбден ықтимал» делінген жазбада.
Расында баланың кіммен араласатынына мән бермеу басқа да көптеген жағымсыз жағдайларға әкеп соғуы мүмкін. Мәселен, олардың деструктивті идеологиямен уланған ортаға тап болуы да ғажап емес. Соның салдарынан көптеген жастар теріс діни жолға түсіп, отбасынан алыстап, кейбірі шетел асып жатқаны белгілі.
Ішкі істер министрлігі отбасындағы жанжалдар, қолайсыз психологиялық ахуал мен ата-ананың теріс мінез-құлқы да балалардың қауіпсіздігіне кері әсерін тигізетінін айтады.
«Әдетте үйдегі ұрыс-керіс пен зорлық-зомбылық кәмелетке толмағандардың бойында сенімсіздік, тұрақсыздық тудырып, ынжық және жасық мінез-құлықтың қалыптасуына себеп болады» делінген жазбада.
Келесі қателік – интернет пен гаджеттерге еркін қол жеткізуі. «Ата-аналар баласының телефонды немесе планшетті қалай пайдаланатынын бақыламаса, ол баланың қауіпті интернет қауымдастықтарға тартылуына, зорлық-зомбылықты насихаттайтын тыйым салынған контентті көруіне және күмәнді адамдармен байланыс орнатуына әкелуі мүмкін. Мұндай жағдайлар балаларға қатысты кибербуллинг пен зорлық-зомбылықтың орын алуына себеп болады» дейді ІІМ мамандары.
Бесінші қателік – тәрбиелеу функциясын ұмыту және жеке үлгінің маңызын елемеу. «Кейбір ата-аналар балаларды мұғалімдер тәрбиелеуі тиіс деп есептейді немесе баланың ненің дұрыс, ненің бұрыс екенін өзі түсінеді деп қате ойлайды. Бұл – моральдық-этикалық құндылықтардың бұзылуына және девиантты мінез-құлықтың туындауына әкеп соғуы мүмкін» делінген жазбада.
Жасұлан БАҚЫТБЕК
