Бұхарада медресе салып, ұстаздық етіп жатқан Абдолла Йемениге әр жақтан сұрақтар келіп тұрады екен.
Бір жолы келген сұрақтың жауабын таба алмай, Бұхарадан 40 шақырым жерде Гиждуван елді мекенінде тұратын, тұрмысқа шықпаған, білімді, тақуа Бибіқыз есімді әйелге осы сұрақтың жауабын сұратып екі шәкіртін атпен жібереді.
Әлгі шәкірттер оның үйіне жетіп, есікті қақса, Бибіқыз арғы жағынан сұрақтың жауабы жазылған хат беріпті.
Осы жағдайдан хабар алған Абдолла Йемени әлгі екі шәкіртті қайтадан, сол Бибіқызға өзіне әйелдікке алу ниеті барын айтып, құдалыққа жібереді.
Шәкірттер Бибіқызға барып, келген шаруаларын айтса,ол:
«Сіздер дереу медресеге қайтыңдар. Барғанша ұстаздарың дүниеден озып, оны жуып, кебіндеп болып, жаназасын оқып жатқанына үлгересіңдер» депті.
Исламда мұндай нәрсені ерекше тақуалыққа жеткен, Алланың уәлиі (досы) дәрежесіне жеткендерге Алладан берілетін «ладуни» ілім деп атайды.
Расында, олар келсе, Абдолла Йемени ұстаз қайтыс болып, ғұсылданып, кебінделіп, енді жаназасы оқылғалы жатыр екен.
Осылайша, Абдолла Йемени ұстаз жерленіп, медресенің аты «Мир – Араб» медресесі аталыпты.
Кейін оның шәкірті болған Убейдолла хан қайтыс болғанда, ұстазының аяқ жағына қойылыпты.
Алла баршасын рақымына бөлесін!
Қуат ҚАБДОЛДА
