Сұрақ: Рамазаннан кейінгі алты күндік оразаны қай уақытта ұстау керек?
Жауап: Рамазан оразасынан бөлек нәпіл оразаларын ұстау да мол сауапқа кенелтеді. Рамазан айы бітіп, айттан кейін шәууәл айының алты күндік нәпіл оразасын ұстаудың да бір жылдық сауабы мен өзіндік даналығы бар.
Бұл алты күндік нәпіл оразасны асқазанға салмақ түсірмей күнара ұстауға болады. Рамазан айының қаза оразалары болса, оларды өтеп, кейіннен алты күндік нәпіл оразасын үзбей қатарынан немесе бөлек-бөлек күндерде шәууәл айының ішінде ұстауға болады.
Пайғамбарымыз (с.а.у.) хадисінде: «Кім Рамазан оразасын ұстап, соңынан шәууәл айында алты күн ораза тұтса, жыл бойы ораза тұтқандай болады», десе, тағы бір хадисте: «Кім Алла үшін бір күн ораза тұтса, Алла оның жүзін тозақтан жетпіс күз алыстатады» деген.
Алланың ризашылығы үшін ұсталған нәпіл оразаларда мол сауап бар екенін ұмытпағанымыз жөн.
Икрам АЙТАЕВ
