Сұрақ: Құмар ойындарының адамға пайдасы бар ма?
Жауап: Ислам діні халал мен харамды айқындап берген. Құран аятындағы «майсир» сөзі «құмар» деген мағынада келген. Қазақстан мұсылмандары діни басқармасының Пәтуа бөлімі де құмар және лотерея ойындарын зерттей келе үкімін харам дегені белгілі.
Құмар ойынның (букмерлік кеңселер, казино, лотереялар, карта, ойын автоматтары, рулетка, т.б.) кез келген түрі харам санатына жатады. Өйткені адамдардың ақшасын, мал-дүниесін құмар ойыны арқылы жеңіл жолмен алу болып саналады. Олар адал еңбекпен табыс табуды тежейді, адамды азғырып, нәпсіне тәуелді етеді, отбасына зиян келтіреді, сәттілік деп ақша табудың соңына түседі. Мұндай іс-әрекеттер адамды құрдымға апарады.
«Бақара» сүресінің 219-аятында: «Олар (адамдар) сенен арақ пен құмар туралы сұрайды. «Ол екеуінде үлкен күнә бар және адамдар үшін кейбір пайдалар қойылған. Алайда пайдасынан күнәсы көп» деп айт» десе, «Майда» сүресінің 91-аятында: «Шүбәсіз, шайтан арақ-шарап һәм құмар ойындары арқылы араларыңа дұшпандық пен өшпенділік отын жағуды, сендерді Алланы еске алудан һәм намаздан тыюды ғана көксейді..» деп, құмар ойындардан аулақ жүруге бұйырған.
Икрам АЙТАЕВ
