ҚМДБ Төрағасы, Бас мүфти Наурызбай қажы Тағанұлының бастамасымен Қарағанды облысы, Саран қаласына қарасты Ақтас кентінде «Ерімбет ата» мешіті салтанатты түрде ашылды.
Алланың жердегі үйі саналатын бұл мешіттің құрылысы 2019 жылы жергілікті азаматтардың және Ерімбет атаның ұрпақтарының қолдауымен басталған. Екі қабатты, 20 метр биіктіктегі мешіттің аумағы 10 гектарды құрайды. 350 адам қатар тұрып намаз оқи алатын кең мешітте ерлер мен әйелдерге арналған намазханалар, 100 адамдық асхана орналасқан. Сондай-ақ, демеушілер тарапынан мешітке қызметтік көлік сыйға тартылды.
Жаңа мешіттің имамы болып Ерғазы Азамат Сайлауұлы тағайындалды.
Ашылу рәсімінде Қарағанды облысының бас имамы Мүфтият баспасынан шыққан 100 дана діни кітапты мешітке тарту етіп, мешіт құрылысында белсенділік танытқан азаматтарға алғыс хат пен шапан тапсырды.
Алдағы уақытта «Ерімбет ата» мешітінде балаларды оқыту және жамағатқа арналған рухани іс-шаралар ұйымдастыру жоспарлануда.
