Сұрақ: Дінімізде ысырапшылдық туралы не айтылған?
Жауап: Ысырапшылдық – мал-дүниесін, керек-жарағын мөлшерден артық жұмсау, артық шығындау. Қазір қоғамда дүниені орынсыз шашу көбейіп кетті. Дәстүрлі Ислам Алланың берген нығметін орнымен пайдаланып, ысырапшылдыққа барудан қайтарады.
«Ағраф» сүресінің 31-аятында: «Ішіңдер, жеңдер, бірақ ысырап қылмаңдар. Шынында Алла ысырап етушілерді жақсы көрмейді» деген.
Пайғамбарымыздың (с.а.у.) хадисінде: «Жеңдер, ішіңдер, садақа беріңдер және киініңдер. Бірақ ысырапшылдық пен дандайсуға жол бермеңдер» деп, ішіп-жеуде ысырапшылдық пен киім киюде менмендіктен қайтарған.
«Судың да сұрауы бар» дегендей, үнемшілдік пен қанағатшылдыққа мән бергеніміз дұрыс.
Икрам АЙТАЕВ
