Сұрақ: Бейнамаз адамды кәпір деуге бола ма?
Жауап: Исламның бес парызының бірі – намаз оқу. Намазды немқұрайлық, жалқаулық танытып тастаған адам күнәһар болды. Күнәлардың артуы жүректі қарайтады. Шынайы құлшылық пен тақуалық Алланың ризашылығына бөлеп, адамды ізгілікке бастайды. Осыған орай Алланың қасында намаздың орны бөлек құлшылық.
Қазіргі таңда радикалды діни уағызшылар намаз оқымаған адамды діннен шығарып «кәпір» болады деп, олармен байланысты үзіп оқшауланып жүруге үгіттейді. Мұндай радикалды діни топтардың ықпалындағы адамдар қылмысқа барып, жиһад деп шетел асқанын білеміз. Адасқан діни топтарға дін негіздерін білмейтіндер, депрессияда жүргендер т.б. адамдар кез болады.
Намаздың парыздарын біле тұра парыз емес деп мойындамаса немесе жоққа шығарса, діннен шығады деген қауіп бар. Ханафи мәзһабында жалқаулық жасап, намазды тастаған адам намаздың парыздығын теріске шығармайынша діннен шықпайды, бірақ күнәһар болады деген.
Пайғамбарымыз (с.а.у.) хадисінде: «Кімде-кім бауырына: «Ей, кәпір!» десе, егер ол адам шынымен кәпір болмаса, онда айтқан адамның өзі кәпір болады» деп, әр діни сөздің мән-мағынасын білмей, орынсыз қолдануға болмайтындығын ескерткен.
Икрам АЙТАЕВ
