Ақтөбе облыстық дін істері басқармасының басшысы қызметіне Жүсіпжан Ақзам тағайындалды. Ол еңбек жолын осыдан 32 жыл бұрын зоотехник болып бастаған.
Бүгін Ақтөбе әкімдігінде облыстық дін істері басқармасының басшысы қызметіне Жүсіпжан Ақзам тағайындалды.
Жүсіпжан Ақзам 1970 жылы Ақтөбе облысында дүниеге келген. 1993 жылы К. А. Тимирязев атындағы ауыл шаруашылығы академиясын, 2001 жылы ҚР Президентінің жанындағы Мемлекеттік қызмет академиясын тәмамдаған. Еңбек жолын 1993 жылы Шалқар ауданының «Сүттікөл» өндірістік кооперативінде зоотехник болып бастаған. Ақтөбе, Қарағанды облыстары, Астана қаласы әкімі аппаратының, «Нұр-Отан» партиясы, «ҚТЖ» ҰК» АҚ, Ауыл шаруашылығы, Денсаулық сақтау, Ұлттық экономика министрліктерінің, Дін істері агенттігінің түрлі лауазымдарында жұмыс істеген.
— Облыс әкімі оның алдына бірқатар міндет қойды. Олардың ішінде — конфессияаралық келісімді нығайту, рухани құндылықтарды насихаттау және ағартушылық іс-шаралар өткізу. Сондай-ақ, дін саласындағы мемлекеттік саясатты жүзеге асыру, заңнаманың сақталуын қамтамасыз ету, діни бірлестіктердің, рухани білім беру ұйымдарының қызметін зерделеу және талдау және экстремизмнің алдын алу бойынша белсенді жұмыс істеу маңызды. Жастарға арналған бағдарламаларды дамыту, сондай-ақ халықаралық діни ұйымдармен ынтымақтастықты нығайту міндеті жаңа басшыға жүктелді, — деп хабарлады Ақтөбе облысы әкімінің баспасөз қызметі.
Айта кетейік, ақпанда Ақтөбе облыстық табиғи ресурстар және табиғатты пайдалануды реттеу басқармасы басшысы қызметіне Исатай Еспағанбетов тағайындалды.
https://kaz.inform.kz/news/aktobe-oblisinda-dn-ster-baskarmasinin-basshisi-tagayindaldi-31e08f/
