Сұрақ: Қажылықта қайтыс болғандарды жерлемей, қоқысқа тастайды деген қауесет рас па?
Жауап: Исламның бес парызының бірі – қажылық. Қажылықтың мақсаттарының бірі – әлемдегі мұсылмандардың арасында сүйіспеншілік орнату. Қасиетті мекенде түсіне, тіліне, ұлтына, жеріне, еліне, дүниесіне қарамай бір киімде, бір жерде, бір уақытта, бір құбылаға бет бұрып үлкен және кіші қажылық рәсімдерін орындайды. Қажылық рәсімдерін орындауда шынайы ықыласпен, рухани тазаруға бағытталғаны абзал. Басқа ниетте болуы шынайы мақсатқа апармайды.
Қазіргі таңда қоғамда қажылықтың шынайы мәнін түсінбей. түрлі пікірлер айтып жүрген адамдар бар. Қажылықта қайтыс болған адамды жерлемей қоқысқа тастайды екен, қажылыққа бару арабтардың дәстүріне еліктеу, т.б. деген секілді. Мұндай көзқарастар дәстүрлі Ислам дінінің тағылымына қайшы екенін ескергеніміз жөн. Қажылық рәсімдерін орындау барысында қайтыс болған мұсылмандарды Меккенің рәсімі бойынша мұсылман зираттарына Ислам дәстүріне сай жаназамен жерлейді. Егер туыстары елге қайтаруды қаласа арнайы рәсімдер арқылы жүзеге асырады.
«Қажылықта қайтыс болғандарды бір шұңқырға көме салады» деген негізсіз сөздерді тарату – шын мәнінде ауыр күнә. «Нұр» сүресінің 15-аятында: «…Сендер сол қауесет сөздің парқын айырып жатпай, оны біріңнің аузынан бірің қағып алып, сөйтіп, өздерің нақты білмейтін мәселені әңгіме қылып, ауыз жимай өсек айтумен болдыңдар. Һәм мұны болмашы әрі жеңіл-желпі нәрсе деп ойладыңдар. Алайды ол Алланың алдында зор күнә саналады» деген.
Ресми дереккөздерге жүгініп, негізсіз жалған ақпараттардан сақ болғанымыз абзал.
Икрам АЙТАЕВ
