Бүгін Щучинск қаласында төртінші Ұлттық құрылтайдың секциялық отырыстары басталды. «Мәдениет. Өнер. Руханият» атты отырысқа қатысқан белгілі исламтанушы Қайрат Жолдыбайұлы қазіргі таңда қалыптасып отырған ахуал туралы ұсыныстарын жеткізді.
«Бірінші айтар ойым, қазір әлеуметтік желі кім болса соның сөйлейтін жерге айналды. Дін атынан сөйлейтін адамдар көбейіп кетті. Олар жастарды теріс бағытта тәрбиелеп жатыр. Соның кесірінен халық діннен суып бара жатыр. Қазір Ислам діні қорғауға мұқтаж болып тұр.
Осыған орай әлеуметтік желіде дін атынан сөйлеу үшін мемлекет тарапынан рұқсат беру секілді шаралар қабылдануы керек.
Екінші мәселе – Ата Заңымыз бойынша наным-сенім бостандығы бар. Ешкімнің сеніміне тіл тигізуге болмайды. Мысалы христиан дінінің құндылықтарына тиіссеңіз, сізді заң бойынша жауапқа тартады. Бірақ осы заң ислам дініне келгенде келгенде жұмыс істемей тұр. Қазір интернетте отырып алып діни құндылықтарымызға, сенімімізге, тарихи тұлғаларымызға тіл тигізіп жатқандар көп. Осыларды жауапқа тартудың шарасын қабылдау керек. Заң бар, бірақ ол жұмыс істемей жатыр.
Үшінші ұсынысым – осыдан оншақты жыл бұрын діни әдебиеттерге қатысты арнайы шешім қабылданып, оларды мемлекеттік мемкемелерден 300 метрден жақын жерде сатуға тыйым салынды. Ал арақ 100 метр қашықтықтан әрі сатылуы керек. Яғни дін арақтан қауіпті болып тұр. Бұл тұтынушылар құқын шектеу деп ойлаймын. Неге егер рұқсаты бар, ресми дін маманының кітаптарын қоғамда еркін сатуға рұқсат бермеске? Қазір діни кітаптар сататын ресми бірде-бір дүкен жоқ. Осы мәселені шешуге мемлекет тарапынан шешім қабылдануын сұраймын» деді Қ.Жолдыбайұлы.
