Сұрақ: Аят мағыналарын сөзбе-сөз түсіну керек пе?
Жауап: Қасиетті Құран аяттары жиырма үш жыл бойы Пайғамбарымызға (с.а.у.) белгілі бір оқиғаға, сұрақ немесе мәселеге байланысты аят-аят болып түскен. Құран аяттарының мақсат-мағыналарын білу үшін аяттың түсу себептерін т.б. ілімдерін жақсы білу керек.
Сахабалар Құран аяттарының мақсатын-мағынасын, тәпсірін пайғамбарымыздан (с.а.у.) сұрап отыратын. Сахабалардан ілім үйренген табиғиндер, одан кейінгі табиғинге ерушілер Құран аяттарын дұрыс пайымдауды бір ізге салып берген. Сол буындардан ілім үйренген төрт мәзһаб иелері қалыптасып, Ханафи мәзһабының ғалымдары мұсылман халқының рухани өмірінен орын тапқан.
Қазіргі таңда жалған уағызшылар арасында Құран аяттарын түсіндіру барысында бұрмалаушылық бой көрсетіп жүр. Олар Құран аяттарының астарлы мағыналарына мән бермей, сыртқы мағынасы бойынша түсіндіреді. Содан кейбір діни топтар арасында жиһад, такфир, бидғат, хижрат, шаһид сынды аят-хадистегі сөздерді түсінуде «буквализмге» (сөзбе-сөз түсіну) бой алдырғандар көп.
Мұндай пайымдар мұсылмандар арасында жік-жікке бөліну мен талас-тартысқа, жанжалға себеп болды. Оның салдары діни алауыздық пен өшпенділікке соқтырады. Түрлі діни топтардың айласынан сақтанып, Қазақстан мұсылмандары діни басқармасына қарасты интернет-ресурстар мен діни мазмұндағы еңбектерге жүгінгеніміз абзал.
Икрам АЙТАЕВ
