14 наурыз көрісу күні – бірлік мерекесі

Көрісу күні – көне тарихтан бастау алатын, бауырмалдық пен сыйластықтың, татулық пен ынтымақтың жарқын мерекесі. Бұл күнді жұрт асыға күтіп, ерекше құрметпен атап өтеді. Әр жылдың 14 наурызында тойланатын бұл мереке, әсіресе, Батыс Қазақстан өңірінде, сондай-ақ Ресейдің кейбір аймағында кеңінен таралған. Көрісу – тек амандасу рәсімі емес, бұл – адамның көңіл түкпіріндегі риясыз ықыласын білдіріп, жақындарына деген құрметін көрсететін ізгі дәстүр. Жасы кіші үлкенге барып, қол алысып, құшақ жайып амандасады. Бұл күні өкпе-реніш ұмытылады, араздық атаулы жойылып, адамдар бір-біріне ақ тілегін арнайды.