Астана қаласы, Байқоңыр ауданы бойынша Белсенді ұзақ өмір сүру орталығының қолөнер шеберлері «80+ Sheber Shop» әлеуметтік жобасы аясында шеберлік сағатын өткізді.
Онда «80+ Әжелер» клубында әжелер мен оқушыларға арналған киім тігу үлгілері ұсынылды. Шеберлік сағатында ісмер Күләш Әбутәліпқызы оқушыларға заманауи қамзолды қарапайым тәсілмен пішудің жолдарын көрсетіп, іс жүзінде тігу әдістерімен бөлісті. Оқушылар шебердің жетекшілік етуімен жиналғандар алдында өз қолдарымен қамзол тікті.
«Сабақ барысында әжелер өз тәжірибелері мен білімдерін жастарға үйретуге дайын екендерін көрсетті, сондай-ақ зейнет жасында жүрсе де, қоғамға қажеттіліктерін сезіне білді. Ең бастысы, оқушылар әжелерден ұлттық қолөнердің қыр-сырын меңгеріп, шеберлік дағдыларын дамытты, бұл өз кезегінде олардың ұсақ моторикасын жетілдіруге оң әсерін тигізеді» деп пікір білдірді еңбек терапиясының инструкторы Балым Өмірзақова.
Екі буын өкілдері әлеуметтік жобаны дамыту арқылы ұлттық қолөнеріміздің ұрпақтан-ұрпаққа жетуіне септігін тигізеді деген сенімдеміз.
