Сұрақ: Қасиетті жерлер мен заттарды құрметтемеудің салдары не болмақ?
Жауап: Кесенелер, мазарлар, ғибадатханалар, Құран Кәрім т.б. заттар мен орындар қасиетті саналады. Адамның бойында адамгершілікке, рухани тазалыққа және тарихи мұраларға деген құрмет болу қажет. Қасиетті жерлер мен заттар әрбір халықтың, діннің және мәдениеттің маңызды құндылықтарының бірі.
Қасиетті орындарда тыныштық сақтау, қоқыс тастамау, әдепті болу, заттарды бұзбау, ластамау, қорламау, т.б сынды амалдарды білуге тиіс. Құран Кәрімді дәретпен ұстау, хадистер мен діни шариғат жинақтарын құрметтеу, Құранды жерге қоймау, аяқ-асты етпеу, мазақ етпеу, бетіне жазу жазбау, тасбих, жайнамаз, т.б. киелі саналатын заттарға құрмет көрсеткеніміз – бұл парасаттылығымыз.
Дінде қасиет саналатын Құран аяттарын аяқ-асты ету немесе басқа діндердің сеніміне жағымсыз көзқарас білдіру, дінараздық алауыздыққа соқтырады. Мұндай алауыздықтың салдары діни тұрақсыздыққа апарады. Алауыздыққа себеп болатын амалдардан сақ болғанымыз абзал.
Қасиетті орындар мен заттарға құрмет көрсету – мәдениет пен дұрыс тәрбиенің белгісі.
Икрам АЙТАЕВ
