Сұрақ: Пітір садақасын беру міндет пе?
Жауап: Ислам діні әлеуметтік жағдайлары төмен, мұқтаж т.б. жандарға аса мән береді. Адамның мал-дүниесінен, жан басынан берілетін зекет, садақа, ораза пітір сынды дүниелер бар.
Ханафи мәзһабы бойынша Рамазан айында мұсылман адамның өзі және отбасы үшін пітір садақасын беруі – уәжіп. Мұндай қайырымдылық шаралар арқылы Алланың ризалығына бөленеді. Игі-амалдары арқылы күнәлары кешіріліп, берекесі артып, мол сауапқа бөленеді.
Пітір садақасын Рамазан айы басталғаннан айт намазына дейін беруі керек. Оның мақсаты – мұқтаж т.б. жандарды қуанышқа бөлеу. Әрбір мұсылман, өзінің және асырауындағы жанұя мүшелерінің атынан береді. Пітір садақаны бидай, ұн, құрма, мейіз, арпа т.б. азық-түліктерден беріледі.
Қазіргі таңда азық-түліктердің орташа бағасына сәйкес ақшалай беруді дұрыс санап, ҚМДБ екі келі ұнның бағасымен 2025 жылдың Рамазан айының пітірін 655 теңге деп бекітті. Дүниесі бар жомарт жандар мейіз, құрманың бағасымен беремін десе, еркі өзінде. Пітірді ағайын-туыстары арасында мұқтаж, т.б. жандарға немесе мешіттерге беруіне болады.
Пайғамбармыздың (с.а.у.) хадисінде: «Ораза ұстаған адамды ұнамсыз сөздер мен жағымсыз іс-әрекеттерден тазарту әрі кедейлерді тамақтандыру үшін пітір садақаны парыз етті. Кім оны (айт) намаздан бұрын берсе, ол зекет болып қабылданады, ал намаздан кейін берсе, жай ғана садақа болып есептеледі» деген.
Ораза пітірімізді шынайы ықыласпен беріп, Алланың разышылығына бөлене берейік.
Икрам АЙТАЕВ
