Бірде ұлы имам Әбу Һанифа ұлы Хаммадтың біреумен ақида мәселесінде айтысып жатқанын көріп қалады. Алдымен екеуін тыңдап алып, кейін ұлына мұндай таласқа бара бермеу туралы ескерту жасапты.
Сонда баласы: «Әке, сіз де басқалармен пікірталас жасап жатасыз ғой?» дегенде имам:
«Ұлым, біз ондай кезде алдымыздағы адамды байқаусызда иманнан суытып алмауға қатты көңіл бөлетініміз сонша, басымызға құс қонақтап, сол құсты үркітіп алмайық дегендей бұған асқан сезімталдықпен қарайтынбыз. Жайлап қана сөзге тарту арқылы ол адамның дұрысын үйренуіне жағдай жасаймыз. Ал сендер әлгі адамды жерден алып, жерге саласыңдар. Бұларың жөн емес», деген екен.
«Дінде зорлық жоқ» демекші, әсіресе сенім мәселесінде таласқанда мен білемдікке салынып, тәкаппарлық танытпай, керісінше барынша мейірімді кейіппен ілімді жеткізу қажет.
Пайғамбарымыз (ﷺ) бір хадисінде: «Сендерге намаз, ораза және садақадан да артық нәрсе айтайын ба?» – деген еді. Сахабалар: «Иә, Расулулла!» – десті. Сонда Пайғамбарымыз: «Жарастыру, татуластыру», – деді (Тирмизи, Қиямет, 56).
Тұрар ӘБУОВ
