«Елімізде USAID және ЛГБТ ұйымдары жабылсын!» деп мәселе көтерген қоғам белсенді Бағила Балтабаева бастамасын Мәдениет және ақпарат министрлігінің назарына ұсынған. Құжат тиісті қол жинаса, министрлік деңгейінде талқыланатын болады.
– Елімізде USAID ұйымы жабылсын! ЛГБТ және оларды қаржыландыратын ұйымдарға тыйым салынсын! Қазақстан мемлекетіне сырттан кірген қасіреттің бірі ЛГБТ ұйымдарының астарлы саясаты мен үгіт-насихаттары болды!
Бір жынысты қарым-қатынасты ашық түрде насихаттаған бұл ұйымдардың ұлтқа балташабар іс-әрекеттерінің ұрпақ үшін тигізген зияны орасан! Аз халықтың жартысы бір жынысты болып кетсе, ұлт ретінде жойылу қаупі туатыны айтпаса да белгілі. Әр мемлекеттің ішінен іріткі салып, ыдырату үшін сол мемлекеттің өскелең ұрпағының санасына қол сұғу арқылы, құйтырқы мақсаттарына жетеді! Сол сияқты Қазақстан мемлекетінде азғындық бағытында жұмыс істеп келген USAID (АҚШ Халықаралық даму агенттігінің) ұйымының жабылуына АҚШ Президенті Дональд Трамптың өзі бұйрық берді, – деп жазылған петицияда.
Автор бұл ұйымның өз қызметін барлық мемлекеттерде тоқтатып жатқанын атап өтеді.
-Мысалы, таяуда Әзербайжан USAID-тың қыметіне тыйым салды. Сондықтан олардың Қазақстаннан да кетуін және оған тыйым салынуын талап етеміз! 2025 жылы 21 қаңтарда АҚШ Президенті Дональд Трамп ЛГБТ ұйымдарының іс-әрекетіне, үгіт-насихатына толық тыйым салды және АҚШ-та бұдан бұлай гендер тек екі жыныстан ғана болатынын кесіп айтты!
USAID (АҚШ Халықаралық даму агенттігі) Қазақстанға 1992 жылы келген, сол уақыттан бері жақсы атты жамылып, бірақ іс жүзінде азғындыққа, қоғамды іштен іріткі салып, бүлінуге бағытталған жобаларды қаржыландырып келген! Соның ішінде Қазақстандағы гомосексуалистер мен трансгендерлердің, яғни ЛГБТ өкілдерінің және ұйымдарының біздің елде пайда болуына себепші болған және соларды қазақстандық қоғам «дұрыс» қабылдауына бағытталған жобаларды барынша қаржыландырып келген, – деп жазады автор.
Дерекке қарағанда, 2001-2024 жылдар аралығында осы бағытқа бөлінген, яғни қаржыландырған соманың көлемі 2,07 млрд долларды құраған. Қаржы алған ұйымдар өте көп, соның ішінде елімізде белгілі ұйымдар, қоғам белсенділері және құқық қорғаушылар да бар.
– БАҚ-та жарияланған ақпарат бойынша келесі ұйымдар мен белсенділер USAID-тен тікелей және сенім білдірген ұйымдар арқылы қаржыландырылған: «Feminita.kz», «Қадыр-қасиет», «Десента», «Oyan, Qazaqstan» қоғамдық ұйымдары, ЛГБТ өкілдері – Ж.Секербаева, Г.Сержан және осы сияқты ұйымдар мен ЛГБТ өкілдері көп. Күмән тудыратын ұйымдар – «Фонд Сорос – Казахстан», «Норвежский Хельсинский Комитет», «Фонд имени Фридриха Эберта», «ILGA-Europe», «Фонд Евразия Центральная Азия», «COC Nederland», «NED», «NDI» осы және осы сияқты ұйымдардың қаржыландыруын, бағыттарын, мақсаттарын, іс-әрекеттерін, үгіт-насихаттарын ҚР Үкіметі тарапынан толық тексеруін талап етемін! – дейді қоғам белсендісі.
Айта кетейік, петицияның негізгі мақсаты – жоғарыда айтылғандарды ескере отырып, Қазақстан аумағында ЛГБТ ұйымдарына және азғындықты насихаттап жүрген ұйымдарға заң жүзінде толықтай қатаң тыйым салу.
