Сұрақ: Діндегі талас-тартыс қайда апарады?
Жауап: Мәзһаб ғалымдары түрлі діни мәселеде дұрыс шешім қабылдап, бір пәтуаға келіп отырған. Қазіргі таңда жалған шейх, пірлер діни түсініктерді нәпсісіне ыңғайлап түрлі пәтуалармен адастырып жүр. Өзге елде отырып, жылтыраған уағыздарымен елдің діни тұрақтылығына нұқсан келтіріп, діни алауыздық отын қоздырып отырғаны белгілі.
Дін негіздерін білмей, діни сауатсыздығымен бидғат, кәпір, харам, ширк деп талас-тартысқа барып жүректері бүлініп жатқан азаматтар да аз емес. Мұндай жағдайларда ҚМДБ ұсынған исламтанушы, дінтанушы ғалымдардың сүзгіден өткен діни ақпараттарына сүйенгеніміз дұрыс. Алла тағала барлық сипаттағы талас-тартыс пен бүліктен қайтарған.
Пайғамбарымыз (с.а.у.) хадисінде: «Дінде тартыспаңдар, өйткені тартыс жүректі қатайтады», десе, тағы бір хадисінде «Алла Тағала ең жек көрінішті адам – ең көп тартысатын адам» деген.
«Анфал» сүресінің 25-аятында: «Және сендерден жеке залым болғандарға ғана кесірі тиіп қалмайтын бүліктен сақтаныңдар…» деген.
Исламдағы талас-тартыс адамдардың жүрегін қарайтып, қатыгездікке, қате пікірлер мен діни алауыздыққа алып келеді. Мұндай алауыздықтан сақтанып, еліміздің діни тұрақтылығына үлесімізді қосайық.
Икрам АЙТАЕВ
