Сұрақ: Рия деген не?
Жауап: Рия сөзі – арабтың екіжүзділік, көзбояушылық, ықылассыздық деген мағыналарын білдіреді. Діни тұрғыдағы мағынасы – біреудің құрметіне ие болу және жақсы көріну үшін біреудің көзіне жағымды іс-әрекеттер жасау.
Исламда рияшылдық күнәға апаратын жағымсыз қасиеттердің бірі болып саналады. Сауабын үміт етіп істеген жақсы амалдар Алланың ризалығы үшін орындалуға тиіс. Рияшылдықпен орындалған амалдар дұрыс саналмайды.
Рияшылдыққа мына амалдар жатады: жақсы сауапты амалдарды пайда көру үшін жасау, мадақ-мақтау алу үшін садақа беру, беделді көріну үшін ықылассыз құлшылық амалдарын жасау, т.б.. Адамның ізгі ниетпен істелген құлшылық амалдары рия саналмайды.
«Бақара» сүресінің 264-аятында: «Уа иман келтіргендер! Мал-пұлын ел-жұрт көрсін деген ниетпен жұмсайтын, Аллаға һәм ақирет күніне сенбейтін адамға ұқсап, берген садақаларыңды міндентсіну немесе (садақа алған жандарды) ренжітетін сөздермен әрекеттерге бару арқылы зая қылмаңдар» деген. Қандай амалдар істесе де ниеті шынайы, таза болуы қажет.
Икрам АЙТАЕВ
