Сұрақ: Өлген адамды түсінде әртүрлі жағдайда көрсе не болады?
Жауап: Адамның түс көруі табиғи жағдай. Ислам шариғатында түстен шариғи үкім алынбайды және түс жоруға міндеттемейді. Түстерді түсіндіруде нақты ереже жоқ. Түс адамның сеніміне, ішкі сезімдері мен адамның өмір жағдайына байланысты болады.
Пайғамбарымыз (с.а.у) хадисінде: «Түс үш түрлі: ізгі түс – Алладан сүйінші және қайғыртушы түс – шайтаннан және ойында жүрген нәрсені түсте көруі», деген. Салих түс – алда болатын, күтіп тұрған нәрселерді алдын ала ескерту мақсатында болатын түс. Шайтани түс – адам ұйықтап жатқанда шайтанның адамдарды қорқытуы, жүрегіне уәсуәсә салып, адастыру үшін болатын түс. Нәпсани түс – сүріп жатқан өміріне байланысты оқиғалардан туындайтын түс.
Пайғамбарымыз (с.а.у) хадисінде: «Егер бірің жақсы түс көрсеңдер, ол Алладан және ол үшін Аллаға мадақ айтыңдар. Ол түс жайлы достарыңа айтыңдар. Егер жағымсыз түс көрсеңдер, ол шайтаннан және бұл түстің жамандығынан Алладан қорған тілеп, ешкімге айтпаңдар, сонда оған зиян тигізбейді» деген.
Зиянды түстер көрген адам түсін ешкімге айтпауға тиіс. Шошып оянатын жағдай болса, сол жағына үш рет білетін аят-дұғаларды оқып үрлеп қойса болады. Ұйықтар алдында тазаланып дәрет алып, дұға оқып жатуды әдетке айналдырғаны дұрыс.
Икрам АЙТАЕВ
