Сұрақ: Дәрет алып, намазды күтіп отырғанда көзім ілініп кетіпті. Бірақ айналамдағы дыбыстарды естіп жаттым. Мұндай жағдайда не істегенім дұрыс? Дәретім бұзылды ма?
Жауап: Намаздың кілті – дәрет. Дәрет дұрыс болса, намаз да дұрыс. Намаздың шынайылығы – ықыласта.
Осы орайда, дәретті бұзатын жағдайлар: Ағзадан несеп, нәжіс, жел, қан, ірің т.б. сынды ластықтардың шығуы және естен тану, қатты жындану, ессіз ұйқыға кету.
Намазды бұзатын жағдайлар: Намазда сөйлесу, ішіп-жеу, қатарынан бірнеше іс-әрекет жасау, құбыладан бұрылу, әурет жерінің қатты ашылып кетуі, намаз оқыған адамның дәретінің бұзылуы, дауыстап күлу, талып қалу, ақылынан адасу, намаз ниетін ауыстыру, намаздың бір парызын тастау, тәйәммүммен намаз оқыған адамның суды көруі, намаз бітпей жатып сәлем беру.
Намазды күтіп көз ілініп қатты ұйқыға кетіп, айналадағы іс-әрекеттерді естімейтіндей жағдай болса, дәрет бұзылады. Ал жеңіл көз ілініп айналадағы іс-әрекеттерді естіп жатқан болса, дәрет бұзылмайды, құлшылығын жалғастыруына болады.
Ибн Аббас риуат еткен хадисте: «Жатып ұйықтаған ұйқы үшін дәрет алу керек. Өйткені, жатып ұйықтаған сәтте адам ағзалары босаңсиды» деген. Ал егер адам «Дәретім бұзылды» деп күдіктенсе, дәретін жаңалап алғаны дұрыс.
Икрам АЙТАЕВ
