Елордада Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Польша Республикасының уақытша сенімді өкілі Михал Лабендамен өзінің өтініші бойынша кездесті.
Бас мүфти поляк дипломатын 11 қараша – Польша Республикасының тәуелсіздік күнімен құттықтап, екі ел арасындағы жан-жақты байланысқа үлес қосып келе жатқаны үшін алғысын білдірді. Сондай-ақ Михал Лабендаға қазақ еліне және тіліне деген құрметі үшін ризашылығын жеткізіп, Діни басқарманың руханият саласындағы игі істерін тілге тиек етті және соңғы уақытта атқарылған айтулы іс-шараларды таныстырып өтті.
Өз кезегінде студент шағы Қазақстанда өткен, елімізде білім алған, поляк дипломаты Михал Лабенда Бас мүфтиге еркін сұхбат үшін алғыс айтып, қазақ еліне, мұсылмандарға деген айрықша ілтипатын білдірді.
