Қазақстанда қазан айының екінші жексенбісінде «Мүгедектігі бар адамдар» күні атап өтіледі. Атаулы күнге орай ҚМДБ «Зекет және қайырымдылық» қоры тарапынан Астана қаласы мен еліміздің әр өңірінде бірқатар іс-шаралар өтті.
Атап айтқанда, елордада «Зекет және қайырымдылық» қорының өкілдері әлеуметтік аз қамтылған, көпбалалы, ерекше балаларды өсіріп отырған отбасыларға тегін ет таратты. Қордың ұйымдастыруымен Ұлттық балаларды оңалту орталығында қызмет алатын 25 бала ата-аналарымен бірге «Думан» океанариумына барды. «Aspan» спорт кешенінде Showdown үстел теннисінен зағип жандар арасында халықаралық жарыс өтті.
ҚМДБ «Зекет және қайырымдылық» қорының директоры Мақсатбек Қайырғалиев Алматы қаласына жасаған іссапары барысында балалары сал ауруымен ауыратын, 3 айлық тігін курсын бітірген аналарға алғыс хаттарды табыстады. Ал қордың Жетісу облысы өкілдігінің ұйымдастыруымен Жаркент қаласында №4 мектеп-интернатының оқушылары үшін жаңа монша ашылды. Сондай-ақ Жетісу облысының бас имамы Керімбек Сәрсембайұлының қатысуымен ерекше жандарға тәттілер, сый-сияпаттар үлестірілді.
ҚМДБ «Зекет және қайырымдылық» қорының Қарағанды облысы өкілдігі және демеушілердің қолдауымен зағип жандарға дастархан жайылды. Көңілді кеште мүмкіндігі шектеулі жандар ән айтып, би билеп, өнерлерін ортаға салды. Ұйымдастырушылар тарапынан оларға сый-сияпат беріліп, құрмет көрсетілді. Сонымен бірге, «Қызыл ай қоғамы» бірлестігінің «ХОСПИС» Қарағанды облыстық аурухана бөлімшесі, онкологиялық аурухананың пациенттеріне моральдық қолдау көрсетіліп, азық-түлік қоржындары табысталды.
Алматы облысында «Тайқазан» қайырымдылық жобасы аясында мүдектігі бар жандарға азық-түлік себеттері таратылды. «Ерекше балалардың ата-аналар одағы» РҚБ және «Қапшағай Самға» мүгедектер қоғамдық бірлестігі, «Қамқор жүрек» мүгедектер қоғамдық бірлестігінде, мешіт тізімінде тіркелген ерекше жандарға бір айлық азық-түлік себеттері таратылды.
Ақтөбе облысында «Зекет және қайырымдылық» қоры мен «Әйел-қыздар» секторының ұйымдастыруымен «Бүгінгі күннің батырлары» атты шара өтті. Облыстық «Нұр Ғасыр» мешітінің асханасында тағдырдың тауқыметіне мойымаған мүмкіндігі шектеулі балалар мен олардың аналарына дастархан жайылды. Әр отбасыға азық-түлік қоржыны мен су жаңа күртешелер таратылды. Сондай-ақ, Ақтөбе қаласындағы «Қабақ баба» мешітінің бас имамы Нұрлыбек Молдабайұлының бастамасымен мүмкіндігі шектеулі ерекше балаларға азық-түлікпен сый жасалды. Ақтөбе облыстық «Ерекше балалар» қоғамдық бірлестігі мекемесіне арнайы барған мешіттің бас имамы балалардың жағдайы мен көңіл-күйлерін біліп, олардың ата-аналарымен сұхбаттасты. Сонымен қатар, Алла Тағала тағдырға жазған сынаққа сабыр етулің маңыздылығы мен сауабы туралы түсіндіріп өтті.
