4 қазанда Астанада ТМД-ға қатысушы мемлекеттердің қауіпсіздік органдары мен арнаулы қызметтері басшылары кеңесінің (ҚОБК) 55-ші отырысы өтті.
Отырыс жұмысына Әзербайжан, Армения, Беларусь, Қазақстан, Қырғызстан, Ресей, Тәжікстан, Өзбекстан, ТМД Атқарушы комитеті мен Терроризмге қарсы орталығының делегациялары қатысты.
Іс-шара басталар алдында делегация басшыларын Қазақстан Республикасының Президенті қабылдады. Кеңес қатысушыларына жолдаған үндеуінде Қ.К. Тоқаев жедел және талдамалық ақпаратпен уақтылы алмасу өңірлік қауіпсіздікке төнетін қатерлер мен қауіптерге қарсы тұрудың тиімділігін арттыруға мүмкіндік беретінін, елдеріміздің ұлттық мүдделерін қорғау үшін үйлестірілген тәсілдерді әзірлеуге ықпал ететінін атап өтті.
ҚОБК отырысы барысында соңғы отырыстан бастап өткен кезең үшін өзара іс-қимыл жасау нәтижелері қаралды. Арнаулы қызметтердің халықаралық терроризм, заңсыз көші-қон, трансұлттық қылмыс, киберқылмыс және есірткі бизнесі саласындағы қатерлерге қарсы іс-қимыл жөніндегі ынтымақтастығының өзекті мәселелері талқыланды.
Отырыс қорытындылары бойынша арнаулы ведомстволардың басшылары ынтымақтастықтың нысандары мен бағыттарын кеңейту, сондай-ақ ТМД мемлекеттерінің қауіпсіздігін қамтамасыз ету жөніндегі жұмыстағы өзара іс-қимылды нығайту қажеттілігі туралы ортақ пікірге келді.
