Бүгін Павлодар қаласындағы «Мәшһүр Жүсіп» орталық мешітінде Қазақстан мұсылмандары діни басқармасының ұйымдастыруымен Құран Кәрімді жатқа және мәнерлеп оқудан ХІІІ республикалық байқауы мәресіне жетті.
80 үміткер қатысқан байқаудың жеңімпаздары мен жүлдегерлерін марапаттау рәсіміне ҚМДБ Төрағасы, Бас мүфти Наурызбай қажы Тағанұлы, сауапты іс-шараға демеушілік жасаған Бахаридин Аблазимов, зиялы қауым өкілдері қатысты.
«Қазақ елі ертеден Құран десе құлағы түрулі тұратын, Алланың сөзін құрмет тұтатын халық. Кімнің үйіне барсаңыз да төрінде Құран ілулі тұрады, ал оны біреу оқыса, ұйып тыңдайды. «Ағраф» сүресіндегі: «Қашан Құран оқылса, Оған құлақ салып тыңдаңдар да үндемеңдер. Әрине мейірімге бөленерсіңдер» деген аятқа амал еткен ата-бабамыздың жолы бізге де нәсіп болып отыр.
Аллаға сансыз шүкір, елімізде жыл санап қариларымыздың қатары артып келеді. Тәуелсіздік алған жылдары Құран оқи алатын адамдарға төрден орын берсек, одан кейін оның бірнеше парасын жаттап алған, тағы бір кезеңде Құранды толық жаттаған қариларға айрықша құрмет көрсетілді. Ал бүгінгі таңда Құран оқудан ижазасы бар қари көрсек, жүрегіміз елжірейді. Осы байқауды өткізуге демеуші болған Бахаридин Нұғманұлына, Сәдуақас Олжабаев қариымыз бастаған әділқазы мүшелеріне алғысымды білдіремін. Байқауға қатысқан қариларымыздың бәрі жеңімпаз атанды деп санаймын. Өйткені бұл байқау әрбір қариға үлкен жігер сыйлады. Жүлделеріңіз құтты болсын» деді Бас мүфти марапаттау рәсімінде.
Сонымен қазылар алқасының шешімімен 4 аталым бойынша жеңіс тұғырынан көрінген қарилардың тізімі төмендегідей:
«Мәнерлеп оқу» бойынша:
І орын ( 700 000 теңге) – Саламат Иманғалиев (Атырау облысы)
ІІ орын (500 000 теңге) – Әбілқасым Әбдірахманұлы (Қарағанды облысы)
ІІІ орын (300 000 теңге) – Әлихан Мұратов (Павлодар облысы)
«10 пара» бойынша:
І орын (1 500 000 теңге) – Дінмұхамед Әбішев (Астана қаласы)
ІІ орын (1 000 000 теңге) – Мұхамедәли Шәкіров (Алматы облысы)
ІІІ орын (750 000 теңге) – Нұрислам Тұражанов (Түркістан облысы)
«20 пара» бойынша:
І орын (3 000 000 теңге) – Арсен Есімбек (Қарағанды облысы)
ІІ орын (2000 000 теңге) – Асадулла Эминтаев (Шымкент қаласы)
ІІІ орын (1 500 000 теңге) – Махмұт Мырзахмет (Түркістан облысы)
ІV орын (800 000 теңге) – Махамбет Тасболатов (Ақтөбе облысы)
V орын (500 000 теңге) – Абдулбасит Маву (Жамбыл облысы)
«30 пара» бойынша:
І орын (автокөлік) – Әбілқайыр Жұбан (Алматы қаласы)
ІІ орын (4 000 000 теңге) – Абдулазиз Илхамжанов (Шымкент қаласы)
ІІІ орын (3 000 000 теңге) – Мансұрхан Уәлихан (Астана қаласы)
ІV орын (1 500 000) – Нұртілеу Сейітқасым (Қарағанды облысы)
V орын (1000 000) – Диас Айтмахан (Жамбыл облысы)
Еске сала кетейік, екі күнге созылған Құран байқауы «Munara TV» телеарнасынан тікелей эфирде және «Муфтият ҚМДБ» YouTube-арнасынан онлайн көрсетілді.
