Сұрақ: Уақытты сөгуге бола ма?
Жауап: «Уақыт» деген ұғым «болмыс», «дүние», «мезгіл», «заман» деген сияқты түсініктерді қамтиды. Әдетте жолы болмай немесе қандай да бір іске сәті келмеген адамдар дереу заманды сөгіп, уақытты кінәлай түседі. Алайда Ислам мұндай амалды құптамайды.
Пайғамбар (оған Алланың салауаты мен сәлемі болсын): «Уақытты сөкпеңдер. Расында да Алланың Өзі – уақыт» деп айтқан (Бұхари). Әрине, Алла мезгіл мен уақыттан тыс. Бұл жердегі хадистің мағынасы «дүниедегі әрбір істің, құбылыстың, уақыттың жаратушысы – Алла».
Алла Тағала: «Олар: «Тіршілігіміз дүниедегі ғана. Өлеміз, өмір сүреміз. Бізді заман ғана өлтіреді» дейді. Негізінде олардың бұған байланысты мәліметі жоқ. Олардікі межелеу ғана» деп хабар берген (Жәсия: 24).
Сонымен қатар Алла «Асыр» сүресінде де: «Заманға серт!» дейді. Негізінде «асыр» сөзі араб тілінде түн мен күндізді білдіреді, яғни «уақыт», «заман» деген сөз. Құдай Тағаланың бұл сүреде «заманға» серт етуі тегін емес. Уақыт – адамға берілген бір өлшем, оның өмірі сол аралықта шектеулі. Құдай Тағала дәл осы уақыт арқылы біреуге жаңа өмір берсе, екіншінің дәм тұзы таусылып, жанын алады.
Пайғамбар Алла Тағаланың былай деп айтқандығы туралы жеткізген: «Адам баласы уақытты сөгіп, Маған тіл тигізеді. Уақытты жаратқан – Мен…» (Бұхари, Муслим). Келесі бір хадисінде: «Сендердің ешбірің: «Барлығы уақыттың кесірінен!» деп (сөкпесін). Расында, уақыт – Жаратушыдан» деп айтқан (Бұхари, Мүслим).
Адам баласы өмірінің әрбір сәтін қадірлеп, Құдай Тағалаға шүкірлік айтуы қажет.
Жалғас САДУАХАСҰЛЫ
