Қостанай облысы Жітіқара аудандық «Ержан Тәтішев» мешітінде жамағат арасында «Әуезді азан» сайысы өтті. Онда 10 адам бақ сынады.
Аталған жарысқа Қостанай облыстық «Аймағанбет қажы Спанұлы» мешітінің наиб имамы Тимур Туребаев, жергілікті мешіттің бас имамы Айбек Қабиев, наиб имам Саидаббос Мираманов және Лисаков қалалық «Әбдіхаим Саламатұлы» мешітінің бас имамы Әкімбек Асанов әділқазылық етті.
Бұл сайыстың негізгі мақсаты – мешіт жамағатының діни білімге, Мұхаммед Пайғамбарымыздың (оған Алланың салауаты мен сәлемі болсын) сүннетіне деген ықыласын арттыру. Жиналған жұртшылық осындай танымдық-тағылымды шараны өткізуге мұрындық болған Айбек Аманқосұлына ризашылықтарын білдірді.
Облыстық «Аймағанбет қажы Спанұлы» мешітінің наиб имамы Тимур Құрманғазыұлы сөз алып, мұндай тәлімі мол сайыстар жамағаттың шеберлігін шыңдайтындығына айрықша тоқталды. Жарыстың қорытындысы бойынша І орынды Ербол Сарбеков (30000 теңге), ІІ орынды Ербол Абибуллаев ( 20000 теңге), ІІІ орынды Батыржан Әлмұхамбетов (10000 теңге) иеленді. Барлық қатысушыларға арнайы сертификат тапсырылды.
