Қытайдың солтүстігіндегі Хэбэй провинциясына жақын маңда шамамен 130 млн жыл бұрын тіршілік еткен екі динозаврдың тасқа айналған қалдығы табылды. Бұл туралы жергілікті табиғи ресурстар агенттігі ұйымдастырған брифингте айтылды, деп хабарлайды ҚазАқпарат Синьхуа агенттігіне сілтеме жасап.
Қалдықтар Чэндэ қаласы Фэннин-Маньчжур автономды уезі аумағынан алынды. Олар екі құсжамбасты динозавр инфражасағы – стегозавр мен мүйізді динозаврға жатады.
Ұзындығы 5 метрлік стегозавр қалдығы мінсіз сақталған. Тасқа айналған сүйек айналасынан тері бөліктері табылды, ол қабыршақ құрылымы бойынша қазіргі жылан немесе кесірткелердің қабығына ұқсайды.
«Біздің заманымызға дейін динозавр терісінің сақталуы – сирек кездесетін, ғылыми құндылығы жоғары құбылыс», – деп жазады Линьи университеті геология және палеонтология институтының қызметкері Го Ин.
Оның пікірінше, стегозаврдың тері бөлігі табылған аумақ – 3 шаршы метр. Олжа динозавр түрінің ерекшелігі, терісінің физиологиялық қызметі, географиялық жағдай мен климаттың өзгеруі сынды бағыттарды терең зерттеуге мүмкіндік береді.
Екіншісі – ғалымдардың пікірінше, сүйекті динозаврлардың «көне» өкілі. Оның бас сүйегінде ростралы сүйек сәл ғана шығып тұр, ал артқы аяқ-қолы алдыңғысынан айтарлықтай ұзын. Институт профессоры Чжан Фучэн мұндай олжа құсжамбасты динозаврлардың осы түрін зерттеу саласындағы білімді тереңдетуге мүмкіндік беретінін айтады.
