Сұрақ: Құстың балапанымен ойнаса бола ма?
Жауап: Ислам барлық тіршілік иесіне мейіріммен қарауға шақырады. Оларды адам баласы жеке мүддесі, рахаты үшін қапаста ұстап жәбір бермеуі тиіс. Жалпы мұсылмандар «Кім мейірімді болмаса, мейірімге бөленбейді» деген пайғамбардың (с.ғ.с.) хадисіне негізделген концепцияны басшылыққа алады.
Пайғамбардың (с.ғ.с.) жануарларға және олардың төлдеріне жанашырлық танытқаны туралы өмірінен көптеген мысалдар келтіруге болады. Мысалы, хазіреті Пайғамбар (с.ғ.с.) сапар барысында біреулердің торғайдың екі балапанын ұстап алғанының куәсі болады. Олардың үстінен анасы шырылдап ұшып жүргенін көріп: «Бұл құсқа балапандары арқылы кім зиян тигізді?» – деп оларды босатуды бұйырды.
Сол сияқты басқа бір саяхат кезінде адамдардың құмырсқа илеуін өртегенін көріп: «Алладан басқа, ешкімнің отпен азап етуге хақысы жоқ», – деп ашуланған (Әбу Дәуіт).
Сондықтан ата-ана балаға жан-жануарға, көшедегі күшік пен мысыққа, шырылдап ұясынан түсіп қалған балапандарға да мейіріммен қарауын ескертуі тиіс. «Балам ойнап отыр» деп оларға жәбір көрсетуден сақ болған жөн.
Жалғас САДУАХАСҰЛЫ
