Қазақстандағы кейбір қазақтар «Жаңа жылды қарсы алмаймыз, ол харам» деп жатқанда Сауд Арабиясы григориан күнтізбесін былай қойып, енді қытайдың жаңа жылын да салтанатпен қарсы алуда.
Бүгін ел астанасы Эр-Риядта қытай павильоны ашылып, мерекелік рәсіммен таспасы қиылды. Қытайлардың сенімі бойынша жаңа жылда жетістік пен табыс әкеледі делінетін қызыл-сары түске боялған арыстан мен айдаһардың дәстүрлі биін билеген өнерпаздарға арабтар дүркірете қол соқты.
Іс-шараға Сауд Арабиясындағы Қытай елшісі Чен Вейкинг пен Таиланд елшісі Дарм Бунтарм, сондай-ақ осы елдегі қытай диаспорасының өкілдері қатысты. Олардың көбі ислам дінін қабылдаған.
«Мен бүгін өзімді Қытайда жүргендей сезіндім, өте бақыттымын. Бұл жердегі әрбір қытай Саудияның үкіметіне Қытайды және оның мәдениетін арабтар мен шетелдіктерге көрсеткені үшін дән риза», – деді қытайлық мұсылман Янг Ликин.
Қытайдың жаңа жылын атап өту арқылы Сауд Арабиясының билігі елдер арасындағы мәдениет алмасу мен өзара ынтымақтастықты тереңдетуді қалайды. Бұл ислам дінін шетелдіктерге таныстыруға да зор мүмкіндік.
