Елордасы Астана қаласындағы «Қазақстан» спорт кешенінде «Медресе темір адамы» республикалық медресеаралық спорттық сайысы өтті.
ҚМДБ елорда өкілдігі мен «Астана» медресе-колледжінің ұйымдастыруымен өткен додалы жарысқа еліміздегі Діни басқармаға қарасты тоғыз медресе және «Хусамуддин ас-Сығанақи» институының шәкірттері қатысты. Сайыстың ашылу салтанатында ҚМДБ Діни білім және кадр даярлау бөлімінің меңгерушісі Смайыл Сейтбеков алғысөз сөйлеп, қатысушыларға Бас мүфти Наурызбай қажы Тағанұлының сәлемін жеткізді. Сайыскерлерге сәттілік тілеп, спортпен айналысу, дене шынықтыру мен салауатты өмір салтын ұстанудың маңызын тілге тиек етті.
Сайысқа келсек, қатысушылар екі номинация бойынша бақ сынасты. Эстафета номинациясы бойынша 100 метр қашықтыққа суға жүзуден «Сарыағаш» медресе-колледжінің шәкірті Даниял Ерланұлы жеңімпаз атанса, «Үшқоңыр» медресе-колледжінің шәкірті Рахым Құрманбек 2-орынды және «Орал» медресесе-колледжінің шәкірті Пана Бейбітұлы 3-орынды иеленді. Эстафета номинациясы бойынша 400 метр қашықтыққа жүгіруден 1-орынды «Үшқоңыр» медресе-колледжінің шәкірті Ниятдин Абдиссаламов жеңп алса, «Һибаттула Тарази» шәкірті Әбдісаттар Русланұлы 2-орынды, ал 3-орынды «Әбу Ханифа» медресе-колледжінің шәкірті Жалғас Орынбасарұлы місе тұтты.
Садақ ату сайысында эстафета номинациясы бойынша 18 метрді дәл көздеуден 1-орын «Орал» медресе-колледжінің шәкірті Елдар Нұрланұлына бұйырса, 2-орынды «Астана» медресе-колледжінің шәкірті Абылай Дінмұхаммедәли, 3-орынды «Әбу Бәкір Сыддық» медресе-колледжінің шәкірті Әлихан Қуантайұлы иеленді.
Ал «Темір адам» номинациясы бойынша жекелей сынға түскен шәкірттер 4 сайысқа қатысты. Атап айтқанда, 200 метр қашықтыққа суға жүзу, Пайғамбарымыздың (оған Алланың салауаты мен сәлемі болсын) өмірбаяны жөнінде тест сұрақтарына жауап беру, 2000 метрге жүгіру және 15-20 метр қашықтықта садақ атудан бақ сынады. Осылайша «Темір адам» номинациясында бас жүлде – ұмра қажылығына жолдаманы «Астана» медресе-колледжінің шәкірті Бөгенбай Нұрмұхаммед қанжығасына байлады. Жеңімпаздар мен жүлдегерлер арнайы медальмен және ақшалай сыйлықпен марапатталды.
Айта кетейік эстафета бойынша командалық есепте «Үшқоңыр» медресе-колледжі көш бастаса, 2-орынға «Орал» медресе-колледжі, ал «Сарыағаш» медресе-колледжі 3-орынға лайық болды.
