Сұрақ: Оразаны дұрыс ұстағым келеді, сол үшін рамазан айында не нәрседен сақ болғаным жөн?
Жауап: 1. Себепсіз бір нәрсенің дәмін тату немесе шайнау – мәкруһ. Бұл оразаның бұзылуына себеп болуы мүмкін. Бірақ, көп кісіге пісірілген тамақ дәмін білу үшін, оның дәмін көріп, түкіріп тастауға рұқсат. Тағам дәмін татқан уақытта ішке (тамаққа) кетіп қалмауы шарт.
- Дәрет алған кезде аузына, мұрнына суды көп жіберу – мәкруһ.
- Шайналып тәттісі кеткен сағызды шайнау – мәкруһ. Сағыздың жаңасын шайнауға мүлдем болмайды.
- Ауызы берік адам әлсіреп өзін сақтай алмайтындай болса, қан алдыруы – мәкруһ. Егер көтере алса, рұқсат. Абзалы, қанды ауыз ашқан соң (күн батқаннан кейін) алдыру.
- Рамазан айында қатты ыстықтап, салқындау үшін ауыз бен мұрынды сулау және суық сумен жуыну – Әбу Юсуф пәтуасы бойынша мәкруһ емес. Себебі мұндай уақытта адамға жеңілдік туады. Пәтуа осы үкімге негізделген.
- Өзіне сене алмаған ауызы берік адамның әйелін сүюі – мәкруһ. Өзіне сенсе, мәкруһ емес. Хадисте пайғамбардың (с.ғ.с) зайыбын сүйгені және әзілдегені туралы келеді[1].
- Ауызы берік адамның гүл мен әтір сияқты нәрселерді иіскеуі және сүрме жағуы – мәкруһ емес.
Жалғас САДУАХАСҰЛЫ
[1] Ибн Мажә, Сиям, 19.
