Бүгін Маңғыстау облысы дін істері басқармасы ақпараттық түсіндіру және қарсы насихат бөлімінің басшысы Ордаған Нұрсұлтан Ақтау қаласындағы “Мейірбике” медициналық колледжінің жоғарғы курс студенттерімен кездесіп, «Интернеттен діни білім алу қауіпті ме?» тақырыбында ақпараттық-түсіндіру жұмыстарын жүргізді.
Іс-шарада басқарма қызметкері студенттерге бүгінгі таңда интертеннің мүмкіндігі шексіз екенін, іздеген нәрсеңнің бәрін табуға болатынын, алайда діни білім алуда пайдасынан зияны басым болуы мүмкін екендігін түсіндірді. Өйткені, қазір деструктивті діни ағым өкілдері өз уағыз-насихаттарын көше аралап таратуды қойып, заманауи әдіс-тәсілдерге толық мойын бұрған. Яғни олар енді интернетте отыр. Теріс ағымдағылардың идеологиясын насихаттайтын сайттар мен әлеуметтік желі парақшалары аз емес. Облыстық Дін істері басқармасы оларға қарсы үздіксіз күрес және қарсы насихат жұмыстарын жүргізіп келеді. Ал діни сауаты төмен жастар олардың тұзағына оңай түсіп қалуы ғажап емес.
Сондықтан Нұрсұлтан Махмутұлы діни білім алғысы келген адам Қазақстан мұсылмандары діни басқармасына қарасты ресми оқу орындарына баруы керек екенін айтты. Діни мәліметтерді де ресми көздерден алған дұрыс.
Іс-шара барысында студенттердің көкейлерінде жүрген сауалдарына да жауап берді.
