Сұрақ: Аллаға тәуекел ету деген не?
Жауап: «Тәуекел» сөзі қазақ тіліне араб тіліндегі «тауаккуль», яғни «бар ісін тапсыру, біреуді уәкіл ету» деген сынды мағыналарды білдіретін сөзден енген. Ислам әрбір мұсылман үшін Жаратушыға тәуекел етуге әмір етеді: «Егер бір іске бекінсең, Аллаға тәуекел ет. Шын мәнінде Алла тәуекел етушілерді жақсы көреді», – деп хабар берген (Әли Имран: 158).
Кейбір азаматтар «тәуекелді» жалаң сөзбен тәуекел ету деп түсінеді, яғни сөзбен Аллаға тәуекел етіп, амал жасаудың қажеті жоқ деп қабылдайды. Бұл қате түсінік. Мұсылман адам көздеген мақсатына жету үшін мүмкін болған себептердің барлығын жасай отырып, істің нәтижесін Аллаға тапсырады. Шамасы келгенше амалын жасап, соңын Құдайдан күтеді. Амалсыз, әрекетсіз жалаң тәуекел болмайды. Әрекетсіз тәуекел – білімсіздік немесе жалқаулық болып саналады.
Жалғас САДУАХАСҰЛЫ
