Маңғыстау облысы Дін істері басқармасының ұйымдастыруымен бүгін Тәуелсіздіктің 30 жылдығына орай «Спорт – денсаулық кепілі» атты ер жамағаты арасында футбол турнирі өтті. Оған облыс бойынша 30-дан аса жамағат қатысты.
Іс-шараның ашылу салтанатында ҚМДБ-ның Маңғыстау облысы бойынша бас имамы Ануар Елжанов «Шынықсаң – шымыр боласың» демекші, дене жаттығуы адам баласына қашан да пайдалы. Күні бойы өзіңді сергек сезініп жүрудің де бір тәсілі – спорт. Спорт адамды шат-шадымен өмір сүруге жетелейді. Ислам діні де адам баласын спортпен шұғылдануға, өнермен айналысуға және денсаулыққа аса мән беруге шақырады» деген лебізін жеткізді.
«Отпан» ақпараттық-түсіндіру және оңалту орталығы» ҚҚ-ның директоры Азамат Тулепов сөз алып, сайыскерлерге сәттілік тіледі.
Жарысқа «Достық», «Шаңырақ», «Бекет-Ата» және «26 шағын аудан» командалары қатысты. 1-ші орынды «Бекет-Ата», 2-ші орынды «Достық», 3-ші орынды «Шаңырақ» командасы иеленді. Оларға діни кітаптар сыйға тартылды.
