Сұрақ: «Хизб-ут-Тахрир» партиясы туралы не білеміз?
Жауап: Қазақстанда экстремистік ұйым ретінде тыйым салынған Хизб-ут-Тахрир «Әл-ислами» партиясының алғашқы эмиссарлары еліміздің оңтүстік өңірінде 1998 жылы пайда болды. Бастапқы кезеңде партия мүшелері жасырын жерде жиналып, өз қатарына жаңа мүшелерді тартты. Кейін эмиссарларының тапсырмасымен аймақтарда осындай құрылымдарды құра бастады.
«Хизб-ут-Тахир» партиясының утопиялық саяси мақсаты – мұсылмандар арасында алауыздық тудыру, мемлекеттік билік жүйесін құлату, ел тарихын мойындамау, ұлттық әдет-ғұрыпты бидғат санау, Конституцияға және заңдық нормаларды мойынсұнбау. Сонымен қатар, олар мәзһабты мойындамайды және тағдырға сенбейді.
2004 жылы Хизб-ут-Тахрирдың Ата Заңымызға қарсы мазмұнда парақшалары мен баспа өнімдерін таратқан 180-нен астам факті тіркелген. «Хизб-ут-Тахрир» партиясына қатысты құқық қорғау органдары 111 қылмыстық іс қозғаған.
Бұл партияның іс-әрекеті экстремистік сипатта екендігі айқындалып, 2005 жылы Астана қаласының соты «Хизб-ут-Тахир» қызметіне тыйым салды.
Қазақстан мұсылмандары діни басқармасы осы партияға қатысты және оның үгіт-насихаттық әдебиеті (кітапшалар, парақшалар) исламдық ілімге қайшы болуы себепті пайдаланылмасын деп пәтуа шығарған.
Жалғас САДУАХАСҰЛЫ
