«Әділетті Ресей» дума фракциясының депутаттары Ресей Федерациясы Үкіметі төрағасының орынбасары Марат Хуснуллинмен кездесу барысында фракция төрағасының орынбасары Гаджимурад Омаров Мәскеудегі мешіттердің жетіспеушілігі мәселесін көтерді.
Қазіргі бар құлшылық үйлері намаз оқуға келген адамдардың барлығын сыйғыза алмайды. Бұл туралы депутат өзінің Facebook парақшасында хабарлады.
Гаджимурад Омаров бүгінгі таңда бас жоспарлар мен аумақтарды дамыту жоспарларында діни ғимараттар, атап айтқанда мешіттер салу көзделмегеніне назар аударды.
Көптеген жылдар бойы Мәскеу мұсылмандары мешіт жетіспеушілігінің зардабын тартуда. Вице-премьер Марат Хуснуллинге арнаған сөзінде халық қалаулысы: «Құрылысқа үлкен ықылас пен қаражат болса да, бүгінде Мәскеу қаласында мешіт салу мүмкін емес, бұл мұсылман қоғамдастығы өкілдерінің әділ наразылығын тудырады», – деп атап өтті.
Көптеген мұсылман қайраткерлерінің айтуынша, астанада мешіттердің болмауы Ресей қоғамындағы ұлтаралық және дінаралық қатынастарға теріс әсер етеді. Сонымен қатар, мұндай мәселелердің шешілмегенін тыйым салынған ұйымдар мен деструктивті ағымдарды насихаттаушылар мен ұстанушылар өз мақсаттарына пайдалануы кәдік.
