Көбіне мұсылман қыз-келіншектер шаш үлгісін жасау немесе шаш алу үшін бөтен адам кірмейтін жеке бөлмеде қызмет алуға мәжбүр болып жатады. Кейбіреулер салон жеке қызмет көрсету мерзіміне жабылуы үшін біршама артық ақша төлейді, ал енді біреулері үйлеріне шақыртып жатады. Бәрінің мәселесі бір – шариғаттың ережелерін бұзбай әдемі болу, сондай-ақ бөтен ер адамдардың көздеріне түспеу.
KAZISLAM порталының тілшісі елордада орналасқан «Muslimbeautyzone» сұлулық салонының басшысы Жәмилә Елтайқызымен әңгімелесіп, мұсылмандарға арналған сән салоны қалай ашылғандығын білген еді.
– Мұндай салонды ашуға қыз-келіншектерге шаш үлгісін жасап жүрген Гүлнәр ханым себепкер болған еді. Ол кісі 15 жыл бойы шаштаразшы болып қызмет етіп жүріп, әртүрлі жағдайларды басынан өткізген. Мәселен, шаш алуға ер азаматтар да келгендіктен, намаз оқитын қыздарға қызмет көрсету кезінде біраз қиындықтар туындаған. Сондықтан ол намазхан қыздардың үйіне баратын немесе олар өздері келетін.
Біраз уақыт өткеннен кейін орамал тағатын мұсылман қыздарға арналған арнайы салон ашу идеясы туындайды. Белгілі жағдайларға байланысты Гүлнәр ханымға Түркия еліне көшуге тура келгендіктен, кәсіпті маған тапсырып кетті. Мен оған дейін тек косметолог қызметін атқарып жүрген едім, – дейді сән үйінің басшысы.
Косметолог қызмет түрінің денсаулыққа ешқандай зиян тигізбейтініне және ислам қағидаттарына еш қайшы келмейтініне нық сенімді. Жәмиләнің айтуынша, оның қас әрлейтін бояуларының құрамында спирт пен шошқа майы жоқ. «Бұл өнім Үндістанда өсетін қынадан жасалады. Сапасы Ресейдің Мұсылмандар одағының мамандары берген сертификатпен расталған», – дейді ол.
Атырау облысының бас имамы Алтынбек Ұтысханұлының айтуынша, дінде қас бояуға қатысты нақты тыйым жоқ. Алайда көрсетілетін қызметтің ашықтығы жіті тексерілуі керек. «Егер ислам қағидаттарына қайшы келетін доңыздың майы секілді қоспалар қосылмаған болса, онда халал сертификаты беріледі. Оны пайдалануға, сатуға рұқсат беріледі», – дейді бас имам.
Жәмилә Елтайқызының ойынша, сән үйінің әдеттегі салондардан негізгі ерекшелігі – тек орамалдағы қыздарды қабылдауы. Сондай-ақ, шариғат шәлісін тағатын қыздар ғана қызмет көрсетеді екен. Балаларымен бірге келушілерге де мүмкіндік жасалған. Яғни, балалардың ойнайтын өз бұрышы бар. Алаңсыз отырып бірден бірнеше қызмет алуға болады. Ең бастысы, сырт көзден алыс отыратындары қыз-келіншектерді қатты қуантады.
– «Beauty-индустрия» тоқтаусыз дамып жатқан заманда сапа жағынан төменге түсіп кетпеу үшін жұмысқа өз істерінің шеберлерін алуға тырыстық. Қай қызмет түрін көрсетсе де, біздің шеберлер сұлулықтың ұлылығын әдемі көрсете біледі. «Ақылға сындарлы ой қандай қажет болса, тәнге сұлулық та сондай керек» болатынын ұмытпауымыз абзал. Әйел адамға шариғатқа теріс келмейтін қажетті барлық қызметті көрсетіп жатырмыз. Атап айтқанда, кірпікті ламинациялау, маникюр, педикюр, шаш қию, бояу, қасқа коррекция жасау т.б. Келушілерге қойылған қандай да бір қатаң талаптарымыз да жоқ. Тек жазылу арқылы ғана біздің сән үйімізге келе алатындығын айтқымыз келеді, – дейді косметолог маман.
Жәмилә ханым қызметтерге қойылған баға қала бойынша орташа ортақ бағаға сай келетінін айтады. Демек, келушілердің қалтасын қақпайды. Қарапайым халыққа қолжетімді бағалар қойылған.
– «Халал» сертификатымыз жоқ. Шындығын айтқанда, оны алуға да қажеттілік тумады. Болашақта сұраныс болып жатса, сертификатты аламыз деген ойдамыз. Біздің осы бағытта жұмыс істеп жүргенімізге төрт жылдың көлемінде уақыт өтті. Қарап отырсақ, бастапқы кезге қарағанда, қазір келушілердің қатары күн санап өсіп жатыр. Бұл біз үшін қуанарлық жағдай. Алланың қалауымен шағын салонымызды үлкен сән үйіне айналдырамыз деген арманымыз бар, – дейді жас кәсіпкер.
Сән саласында біраз жыл қызмет атқарып келе жатқан Жәмилә Елтайқызы елімізде басқа мемлекеттерге қарағанда, «халал» сертификатын алған мұсылмандарға арналған сән салондары жоқтың қасы дейді.
– Тіпті, еліміздің астанасында мұндай салондар бірен-саран. Солардың алдыңғы қатарында біз ашылғанбыз. Қазақстанда шариғатқа қайшы келмейтін әрлеу қызметтерін алғысы келетін нәзік жандылар үшін жұмыс істейтін сән салондары жетім қыздың тойындай елеусіз қалып келе жатқаны дұрыс емес, – деп ойын білдірді косметолог маман.
Балжан ӘУЕЗХАНҚЫЗЫ
Ассаламуалейкум
Менде мынадай сурак:мен намаз оқымай жатып орамалға келми жатып маникюр жасап жұмыс жасайтын едім.Ал қазір мен намазда орамалдамын маған енді ол жұмысты жасаудын кажеті жоқ иа…