Бүгінгі таңда көпбалалы аналарға, ауру сәбилерге, тағдыр тауқыметіне ұшыраған жандарға жасырын және жария түрде көмек берушілер қатары күн санап көбейіп жатыр. Асыл дініміз исламда: «Алланың жолында не жұмсасаңдар да, Алла Тағала міндетті түрде оның орнын толтырады» («Сәбә» сүресі, 39-аят) делінген. Қайырымдылық – мұқтаж жандарға көрсетілер көмек, беруші үшін сансыз сауап пен жақсылықтың бастамашысы.
Сондай қайырымдылық ісімен айналысушылардың бірі – кәсіпкер Руслан Қуанышұлы. Алматы тұрғыны құрылыс саласында жұмыс істейді. Есімінің көп аталғанын қаламайтын кейіпкерімізбен KazIslam тілшісі телефон арқылы тілдесті.
«Мен құрылыс саласында істейтін жеке кәсіпкермін. Алла разылығы үшін табысымның отбасымнан артылған бөлігін мұқтаж жандарға қолұшын созуға жұмсаймын. Бұрындары көмекке мұқтаж деген адамдарға өзім ақша бере салатынмын. Кейіннен олардың арасында да «алаяқтар» бар екенін білдім, содан бері қажет қаражатты арнайы қайырымдылықпен айналысатын қорларға аударып тұратын болдым. Солардың бірі өздеріңіз білетін «Харекет» қайырымдылық қоры. Содан кейін Алматыдан «Үміт» қайырымдылық қорын аштық»,-дейді ол.
Кәсіпкердің айтуынша, қорда арнайы құрылған комиссия мүшелері бар. Олар көмекке зәру адамдардың құжаттарын тексеріп, содан кейін барып қана өзара шешім шығарады.
«Қазір байқасаңыз, әлеуметтік желіде қаржылай көмекке мұқтаж ауру сәбилер көп. Қордағылар олардың бәріне бірдей көмектесе алмайтындықтан, құжаттарын, дәрігер анықтамаларын алдырып, ішіндегі ең жағдайы ауыр, қолдау көрсетпеске болмайды деген жандарға бірінші болып қолұшын созады. Мен өзім қордың ішкі жұмыстарына араласпаймын. Тек қажет қаржыны аударып отырамын», -дейді Қуанышұлы.
Руслан Қуанышұлы «Харекет» қоры арқылы көпбалалы анаға пәтер сыйға тартқан. «Адамның сипаты – пейілінде» деген ол қысқа ғұмырда әрбір адам қолынан келгенінше жақсылық жасап, бір-біріне демеу болса дейді.
«Абайдың жас ұрпаққа «Атаның ұлы болма, адамның ұлы бол» деп өсиет қалдырғаны белгілі. Өзін мұсылманмын деген әрбір жан ізгі, мейірімді, өзгелерді қадірлейтін, өз мүддесін қоғам мүддесімен ұштастыра алатын, өзі үшін де, өзгелер үшін де еңбек ете білетін, өз құқығын қорғап, өзгелердің құқығын сыйлайтын, өмірден кеткен соң артына жақсы сөзі мен iзгi амалдарын қалдыратындай болуы тиіс. Мен туғанымнан бері тағдырдың сан түрлі соқпақтарында кездескен қиындық атаулынын барлығын дерлік шынайы сенімділікпен, «тек алға» деген өмірлік ұстанымым арқылы шамам келгенше жеңiп келемін. Бір ақ рет берілетін өмірді неге пайдалы қылып өткізбеске?! Дүние қолдың кірі деп бабаларымыз бекер айтпаған. Мейірім көрсетіп, көмек созу үшін қалтаңның қалың болуы міндетті емес. Жылы қабақтың өзі садақа. Сондықтан біз жақсылық жасауды қоғам болып насихаттасақ екен»,-деді ол.
Жүрегінде иманы бар жұрт қолынан келгенше Алла алдындағы қасиетті парыздың бірін қайырымдылық деп біледі. Пайғамбарымыз (с.ғ.с.): «Бес нәрсенің қадірін біл. Олар: өлімнен алдын өмірдің, ауру келмей денсаулықтың, әурешіліктен бұрын бос уақыттың, зағиптықтан бұрын жастықтың, кембағалшылықтан бұрын байлықтың қадірін біл» деген. Аста-төк болмаса да азын-аулақ табысының өзін өзгелермен бөлісіп жүретін қайырымды жандар көп болғай!
