Сұрақ: Төсек қатынасынан кейін ғұсыл алу міндет пе?
Жауап: Ислам – мұсылманның сырт келбетіне, жан дүниесі мен отбасына және өмір сүретін ортасына қатты көңіл бөліп, оны тазалыққа шақырады. Пайғамбар (с.ғ.с) былай деп айтқан: «Тазалық – иманның жартысы» (Мүслим). Сондықтан жас-жұбайлар өздерінің төсектегі ерлі-зайыптылық борышын орындаған соң, олардың бой дәрет алулары қажет. Бой дәрет дегеніміз – шомылу.
Алла тағала Құранда: «Егер де жүніп болсаңдар (бой дәретсіз болсаңдар), толық тазаланыңдар (шомылыңдар)», – деп әмір етеді (Мәида: 6).
Ерлі-зайыптылар үшін бой дәреттің маңыздылығын пайғамбардың (с.ғ.с.) келесі хадисінен де байқауға болады:
«Ерлі-зайыптылар төсек ләззатынан кейін гұсыл құйынуы керек» (Әбу Һурайрадан келтірген Муслимнің риуаяты).
Бой дәрет алу ережелері мыналар:
- Әғузу-Бисмилләһты іштей айту;
- Ниетті іштей айту;
- Ұятты жерін жуып тазалау;
- Ауызға су алып, тамаққа жеткізіп үш мәрте шаю;
- Мұрынға су алып, кеңсірікке дейін үш рет су жүгірту;
- Ине көзіндей кебу жер қалдырмай, дене мүшелерін толығымен үш рет жуу (алдымен бас, сосын оң иық, сол иыққа су құйылады).
Міне, Ислам ерлі-зайыптылардың жан мен тән тазалығының арасындағы үйлесімділіктің сақталуына көптеп көңіл бөледі. Себебі, әрбір ізгілік жұмсақтық пен тазалықтан бастау алады.
Егер жастар ғұсыл құйынудан бұрын біраз демалғылары келсе, онда барып жеңіл жуынып (сумен тазаланып) немесе дірет алып келіп жатады. Демалып болған соң шомылады. Білкім, кейбір жастарымыз: «Мен бәрібір намаз оқымаймын. Маған шомылудың немесе тазаланып жуынудың қажеті жоқ» деп бұған селқос қарауы ғажап емес. Әрине, бұлай ойлау қате. Сен намаз оқымасаң да заты мұсылман баласысың. Тазалық ешкімге де зиян келтірмеген. Жанның, тәннің тазалығы сау-саламат ұрпақтың кепілі.
Жалғас САДУАХАСҰЛЫ
Рахмет