Алдымен «қаза» туралы ұғымға тоқталайық. Ерлерге жұма намазын мешітке барып оқу – уәжіб. Ал әйел адамға жұма намазын мешітте оқу міндетті емес. Пайғамбарымыздың: «Жұма намазын әрбір мұсылман адамның жамағатпен оқуы уәжіб екендігі ақиқат. Тек мына төрт топқа: бас бостандығы жоқ құлға, әйел адамға, сәби мен ауру адамдарға міндет емес» деген хадисі бар. Парыз немесе уәжіб болмаған нәрсе орындалмаса, қаза да болмайды. Сондықтан жұма намазына бара алмасаңыз да, үйіңізде жұма күнгі бесін намазын өз тәртібімен оқып жүрген болсаңыз, «жұманы қаза қылдым» деп алаңдауыңызға шариғи негіз жоқ.
Енді әйел адамның мешітте жұма оқуының дұрыстығы мәселесіне келейік. Әйелдерге мешітке баруға тыйым салынбаған, ал жұма намазын мешітте оқуы сахих (дұрыс) амал саналады. Бірақ «сахих» сөзі міндеттілікті білдірмейді. Мұның есесіне әйелдердің өз үйінде намаз оқуы жамағатпен бірге оқудан әлденеше есе сауапты екендігі жөнінде хадистер келтірілген. «Әйелдеріңе мешітке баруға тыйым салмаңдар. Алайда олардың өз үйлерінде оқығаны абзалырақ» деген хадис те бар.
Дегенмен әйел адам жұма намазын мешітте оқып, сахих амал жасауға ниет еткен болса, оның да өзіндік шарттары бар. Әйел адамдар ерлермен жамағат болып намаз оқи алады, бірақ олармен бір сапта тұра алмайды. Пайғамбарымыз әйелдер жамағатқа қосылып, бірге намаз оқыған жағдайда оларды артқы сапқа тұрғызған. «Ерлерге ең жақсы қатар – алдыңғысы, ал ең жаманы – соңғысы. Ал әйелдер үшін ең жақсы қатар – соңғысы, ең жаманы – алдында болғаны» деген Пайғамбарымыздың хадисі бар. Сонымен қатар әйелдер ер адамдармен бірге намазға ұйыған жағдайда сәждеден басын ерлерден кейін көтергені абзал делінеді.
Осының барлығы әйелдердің ерлермен жамағат болып намаз оқи алатынының дәлелі болып табылады. Әрине, ерлер мен әйелдердің намаз оқитын жерінің бөлек болғаны абзалырақ, бірақ сіздің жағдайыңызда ондай мүмкіндік болмаса, өз аулыңыздағы мешітте жамағаттың артқы сабында тұрып, намаз оқудың шариғатқа қайшылығы жоқ.
Ал ауыл имамының «әйелдердің жұма намазын ауылда оқығаны дұрыс» дегенін жоғарыда айтылғандай не парыз, не уәжіб болмаған амал үшін сіздің жол жүріп, артық әуре-сарсаңға түсіп, қиналғаныңызды жөн санамағандықтан туған тұжырым деп білген жөн. «Қиындатпаңдар – жеңілдетіңдер, қорқытпаңдар – сүйіншілеңдер» деген Пайғамбарымыздың хадисінде білдірілгендей, ислам – жеңілдік діні болып табылады.
