Қандай мәдениет болса да, оның түп негізінде белгілі бір дін жататыны ақиқат. Діннің әрбір азаматтың өмірінде алар орны айырықша. Олай болса, тәуелсіз Қазақстанның рухани негізін қазақ мәдениеті құрайтын болса, ол мәдениеттің өзегі ислами құндылқтар екені белгілі. Бұл оймен келіспейтіндердің де жоқ емес. Соңғы бірнеше жылдан бері дәстүрлі қазақ мәдениетін күстаналап, оны дінсіздік ретінде бағалайтын ұшқары көзқарас жастар арасында белең ала бастады. Аталмыш пікірлер ұшқары және діни сауатсыздық кесірінен пайда болғаны көз ашық, көкірегі ояу азаматтарға белгілі. Дегенмен, біздің өміріміздегі дәстүрлі Ислам құндылықтарының рөлін ешкім жоққа шығара алмайды. Біздің ата-бабалармыз дін ұстауда ешқашан да фанатизмге бой ұрмаған. Қазақ халқының бай ауыз әдебиеті мен би-шешендердің сөздері, жыраулардың маржандай жыр-дастандары, ортағасырлық ғұламар еңбектері осының айқын айғағы.
Қандай да бір дәстүрлі діни құндылықтарда Құран мен сүннетті басшылыққа алған мейірімділік, адамгершілік пен татулық уағыздалады. Мәселен, қазақ халқының дәстүрлі түсінігінде адамгершілік қағидаттары ерекше бағаланып, ұрпақтан-ұрпаққа дәстүр ретінде мұра боп жалғасып келеді. Соның бір көрінісі ретінде «Таспен атқанды аспен ат», «Тек жүрсең тоқ жүресің…», т.б. аталы сөздері мына аят-хадистермен сабақтасып жатыр: «Алла жер бетіне зұлымдық қаламайды»,-деген Құран аяты және хз. Пайғамбарымыздың: «Жақсылық жасау қолыңнан келмесе жамандық та жасама.»,-деген мазмұндағы хадистерімен астасып жатыр. Ал, бүгінгі жастар арасында тура жолда қалыптасқан осы дәстүрлі һәм діни құндылықтарымызды терістеп, Ислам діні ретінде басқа елдің дәстүрілі мәдениетін насихаттап жүргенінен білмей жүр. Бұл біздің рухани және саяси тұтастығымызға әсер етпейді деп айту қиын.
Осы мәселе турасында Елбасымыз Н.Ә.Назарбаев жыл сайынғы халыққа арналған дәстүрлі Жолдауларында, жасаған баяндамалары мен сөйлеген сөздерінде дәстүрлі Ислам құндылықтарының маңыздылығын айтып келеді. Биылғы «Қазақстан – 2050. Қалыптасқан мемлекеттің жаңа саяси бағыты» атты Жолдауында Елбасымыз: «Бүгінде біздің халқымыз үшін дәстүрлі емес діни және жалған діни ағымдар мәселесі өткір тұр. Жастарымыздың бір бөлігі өмірге осы жат жалған діни көзқарасты көзсіз қабылдайды, өйткені, біздің қоғамның бір бөлігінде шеттен келген жалған діни әсерлерге иммунитеті әлсіз.
Біздің Конституция сенім бостандығына кепілдік береді, бұл – факт. Бірақ, өздеріңіз білетіндей, шексіз еркіндік деген болмайды. Ол дегеніміз – хаос. Барлығы да Конституция мен заңдар аясында болуға тиіс.
Әркімнің таңдау құқығы бар. Діни таңдауға өте үлкен жауапкершілікпен қарау керек, өйткені, адамның өмірлік салты, тұрмысы, көп жағдайда бүкіл өмірі соған байланысты.
Бүгінде, интернет пен жоғары технологиялар ғасырында, ақпараттар тасқындаған заманда, «ішкі сүзгі» адамның ішінде болу керек.
Біз қоғамда, әсіресе, жастар арасында діни экстремизм профилактикасын күшейтуіміз керек»,-деп атап өткені белгілі.
Осы елбасымыздың айтқан ойынан да дәстүрлі ислами құндылықтардың атамзаманнан бері біздің халқымыздың өмірінде айырықша маңызға ие екенін біле аламыз.
