Оқу орнының толық атауы: «Қазақстан мұсылмандары діни басқармасы» республикалық ислами діни бірлестігінің«Астана медресесі» жеке мекемесі
Мекен-жайы:Астана қаласы, Есіл ауданы, Қабанбай батыр даңғылы, 36 үй.
Меншік түрі:Жеке мекеме.
Байланыс телефондары: 24 46 44, 24 30 44, факс 24 46 29
«Астана медресесі» жеке мекемесі Қазақстан Республикасы, Астана қаласы, Есіл ауданы, Қабанбай батыр даңғылы №36-да орналасқан. Астана медресесі 2007 жылы Қазақстан мұсылмандары діни басқармасы тарапынан ашылды. Медресенің оқу процесі – күндізгі, мерзімі – 2 жыл 10 ай. Астана медресесінің құрылтайшысы – Қазақстан мұсылмандары діни басқармасы.
Астана медресесінің демеушілігін «Қазақстан – 2030» жастарды қолдау қоғамдық қоры» атқарады, осы мақсатта Қор мен Құрылтайшы арасында өзара келісімшарт жасалған.
Медресе Әділет министрлігінде тіркелген (№5024-1900-ДБ Астана қаласы, 2007ж. 30 қараша). ҚР Білім және ғылым министрлігінен алған мерзімі шектелмеген мемлекеттік лицензиясы (№0064030 Серия АБ, Астана қаласы, 2008ж. 27 қыркүйек) бар.
«Діни қызмет және діни бірлестіктер туралы» Қазақстан Республикасының заңына сәйкес Астана медресесі жеке мекеме ретінде 2013 жылы 30 қаңтарда Астана қаласы Әділет департаментінен қайта тіркеуден өтті.
2007 жылы ашылған Астана медресесі қазір біршама тәжірибе жинақтаған беделді оқу орнына айналып үлгерді. Медреседе штат бойынша 4, штаттан тыс 11 оқытушы сабақ береді. Сонымен қатар Құрылтайшы мен Мысыр елінің «Әл-Әзһар» университетінің арасындағы келісімшарт негізінде келген 2 араб оқытушы жұмыс істеуде. 2 оқытушының докторлық (тарих, филология, философия салалары бойынша), 1 оқытушының кандидаттық (филология), 1 оқытушының магистрлік (дінтану магистрі) дәрежесі бар. Басқа оқытушылардың барлығы жоғары білімді, негізінен «Нұр» Қазақ-египет ислам университетінің, Халықаралық Қазақ-Араб университетінің, Ташкент ислам институтының, Ташкент ислам университетінің түлектері. Ұстаздардың базалық білімі, мамандану деңгейі орта діни оқу орны, яғни медресе оқытушысына қойылатын жүйелі діни білім беру талаптарына сай. Әрбір оқытушының өз пәндеріне арналған Жұмысшы оқу бағдарламасы, дербес жұмыс жоспарлары жасалған. Штаттық жылдық оқу жүктемелері медресенің оқу бөлімі тарапынан бекітілген. Медресенің оқыту жоспарына мемлекеттік стандартқа сәйкес зайырлы пәндер енгізілген.
Медреседе оқытылатын барлық оқулықтар, әдебиеттер мен оқу бағдарламасы Қазақстан мұсылмандарының діни басқармасы тарапынан бекітілген. Олар ханафи мазхабының ұстанымдарымен толық сәйкес келеді деп құпталған. «Ақида» пәнін жүргізу барысында Матуриди еңбектері негізге алынады. Өзге ақида өкілдерінің көзқарастары салыстырмалы түрде түсіндіріліп, Матуриди ақидасынан ерекшеліктері көрсетіліп отырады. Фикһ пәнін оқытуда ханафи мазхабы өкілдерінің еңбектері мен осы бағыттағы жинақтар пайдаланылады.
Медресе кітапханасы жеке ғимаратта орналасқан, жалпы алаңы – 190 шаршы метр. Кітапханада арнайы оқу залы бар. Медресенің жалпы кітап қоры 3000-ға жуық. Ислам діні саласындағы кітаптармен молынан қамтылған кітапхана қорында сонымен қатар экстремистік бағыттағы діни ағымдардың теріс идеологиясын ашып көрсететін маңызды әдебиеттер де бар. 2009 жылы кітапхана қорын байыту мақсатында медресе ұстаздары жергілікті демеушілердің көмегімен араб мемлекеттеріне арнайы іссапармен барып, 1500-ге жуық араб тіліндегі танымал оқулықтарды әкелген. 2011 жылдың қаңтарында Түркия Республикасынан да көптеген діни әдебиеттер әкелінген.
Медресенің әрбір оқу жылына арналған мәдени және тәрбие істерінің жоспары жеке бекітіледі. Медреседе түрлі тақырыптағы сұхбаттар, тәлімгерлік дәрістер, мерекелік шаралар, сайыстар жиі өткізіліп тұрады. Студенттерге арнайы компьютер бөлмесі жабдықталған.
Медресенің 100 орындық толық жабдықталған жатақханасы бар. Шәкірттер оқу орнының басшылығы бекіткен күн тәртібіне сәйкес білім алады. Медреседе үш мезгіл тамақ беріледі. Шәкірттерге бос уақытында кітапханада отырып, сабаққа дайындалуға, теледидар көруге, компьютер бөлмесінде жұмыс істеуге жағдай жасалған.
2007-2010 оқу жылында медресені 24 шәкірт, 2008-2011 оқу жылында 29 шәкірт, 2009-2012 оқу жылында 18 шәкірт бітіріп, толығымен жұмыспен қамтылды. 20 шәкірт «Нұр» Қазақ-египет ислам университетіне арнайы жолдама алып, білімін оқу грантымен жалғастыруда. Бүгінгі таңда медреседе 110 шәкірт білім алуда.
