Бүгін Конфессияаралық және дінаралық диалогтың халықаралық орталығы мен Доха халықаралық конфессияаралық диалог орталығының (Катар) ұйымдастыруымен бірлескен онлайн дөңгелек үстел өтті.
Шараға Катар, БАӘ, Әзербайжан, Бахрейн, Малайзия, Пәкістан, Үндістан және Қазақстаннан діни бірлестіктер өкілдері, тұрақты даму саласындағы сарапшылар, дипломаттар, сондай-ақ диалог және әлеуметтік тұрақтылық мәселелеріне маманданған ғалымдар қатысты.
Дөңгелек үстелдің мақсаты – Тұрақты даму мақсаттарына қол жеткізудегі діни лидерлердің, сондай-ақ Әлемдік және дәстүрлі діндер лидерлері съезіне қатысушылары мен достарының ізгілік құндылықтарын ілгерілетудегі рөлінің маңыздылығын зерттеу.
Дөңгелек үстел тұрақты дамудағы сенімнің рөлін ой елегінен өткізіп, сенімге негізделген бастамалар мен конфессияаралық серіктестіктердің әлеуетін зерттей отырып, дін көшбасшыларының, қауымдастықтар мен институттардың қазіргі заманның ең өзекті жаһандық мәселелерін шешу үшін қалай бірлесіп жұмыс істейтіні туралы жаңа түсініктер берді.
Шараны ашқан Орталық төрағасының кеңесшісі Болат Сәрсенбаев діни ұйымдар мен дін лидерлерінің конфессияаралық диалогты нығайтуға, білім беруді дамытуға және қоршаған ортаға қамқорлық жасауға көптен үлес қосып келе жатқанын атап өтті. «Бірлесе жұмыс істей отырып, біз барлық сенім дәстүрлері ортақ моральдық және этикалық құндылықтарды Тұрақты даму мақсаттарына (ТДМ) қол жеткізу үшін және неғұрлым әділ және инклюзивті әлем құру үшін қолдана аламыз» деді ол.
Өз кезегінде Баку халықаралық мультимәдениет орталығының атқарушы директоры Раван Гасанов бұл пікірталастың бізді біріктіретін құндылықтарды көрсететініне тоқталып, сенімдер әртүрлі болғанымен, ғаламшарымызды қорғауға және адамзатты дамытуға деген ұмтылысымызда шек жоқ екенін атап өтті. Тарихта Ыбырайымдық діндердің әрқайсысы – иудаизм, христиандық және ислам – жаратылысты сақтаудың маңыздылығын атап өткен.
«Діни қауымдастықтар мен олардың лидерлері әрқашан адамгершілік пен жанашырлықтың мызғымас шамшырақтары болды. Қазіргі өзара байланысты әлемде олардың ықпалы бейбітшілікті ілгерілету, кедейлікті жою, балаларымызға дұрыс білім беру, гендерлік теңдікті ілгерілету, қоршаған ортаны қорғау және берік серіктестік орнату сияқты жаһандық басымдықтарды шешуге бағытталған», – деп атап өтті өз сөзінде Доха халықаралық конфессияаралық диалог орталығының директорлар кеңесінің төрағасы, профессор Ибрагим Салих Әл-Наими Наими.
Онлайн-дөңгелек үстел тұрақты даму мақсаттарын бірлесіп ілгерілетуге діни және сарапшылық қауымдастықтардың жоғары қызығушылығын көрсетті. Қорытындылай келе, ұйымдастырушылар барлық қатысушыларға алғысын білдірді және Әлемдік және дәстүрлі діндер лидерлері съезінің 2023-2033 жылдарға арналған Даму тұжырымдамасын ілгерілету шеңберінде сенім, диалог және бірлескен күш-жігер призмасы арқылы жаһандық мақсаттарға қол жеткізу үшін ынтымақтастықты жалғастыруға дайын екендіктерін атап өтті.
