Қасиетті Құрбан айтта «Нұр-Мүбарак» баспасынан шыққан «Таң нығметі» кітабының тұсауы кесілді.
Мотивациялық бағыттағы еңбектің тұсаукесеріне автор Айша Кеңесбайдың журналистика, исламтану, дінтану саласындағы ұлағатты ұстаздары, қоғамға танымал ел ағалары арнайы келіп ақ батасын берді. «Нұр-Мүбарак» университетіне жиылған зиялы қауымға алғы сөзі мен жылы лебізін айтқан проректор, PhD доктор Қайрат Құрманбаев таңғы уақыттың берекесіне де тоқталды. Мұсылман үшін таңғы уақыттың құндылығын бағалауда жаңа еңбектің септігі тисін деген сенімін білдірді.
Ал сексеннің сеңгіріне дейін қолынан қаламы түспей, халыққа қалтқысыз қызмет еткен ардагер журналист, білікті редактор, жақында ғана ҚМДБ Төрағасы, Бас мүфти Наурызбай қажы Тағанұлы құрмет көрсетіп, зейнетке шыққан Оңғар қажы Өмірбек кітапқа толық шолу жасаған әсерімен бөлісті. Журналистика саласында 60 жылға жуық еңбек еткен ардагер:
– Ақпарат әлемінде жүрсем де, «Таң нығметі» – менің таң, адам табиғатының болмысы жайлы танымымды кеңейтті. Бұл кітапта: медицина, дін, ғылым, психология, физиология, барлығы қамтылған. Журналистикада 57 жыл, баспасөз, телерадио саласында, бас газетіміз «Егемен Қазақстанда» қызмет еттім. Бірақ журналистің мұндай шеберлікпен жазған құнды кітабын кездестірмедім. Сондықтан автор Айша Аманқызына ерекше алғысымды айтамын, – деп ағынан жарылды.
Ал академик, қоғам қайраткері Марат Тоқашбаев халыққа берері мол жаңа еңбектің жарыққа шыққанына ыстық лебізін білдірсе, Қазақстан Жазушылар Одағының Төраға орынбасары, профессор Бауыржан Жақып әл-Фараби атындағы ҚазҰУ-дің Журналистика факультетіндегі шәкіртінің жетістігіне қуанышын жеткізді.
Автордың ұстаздары профессор Шамшәдин Керім, филос,ғ.к., доцент Базар Хамзеева, әл-Фараби ат.ҚазҰУ профессоры Клара Қабылғазина шәкіртінің жаңа белесіне ақ тілектерін жаудырды. Сондай-ақ Алматы қаласының Бас имамы Төлеби Оспан, Ұлттық журналистік зерттеу орталығының президенті Дәрмен Смайл Айша Кеңесбайдың діни журналистика саласындағы еңбегіне тоқталса, танымал психолог, блогер Алмас Ақын таңғы уақыттың артықшылығы жайлы еңбектің қоғамға берері мол деген үміттерімен бөлісті.
Осылайша алқалы топтың ақ батасымен қасиетті Құрбан айтта жаңа мотивациялық еңбек оқырманға жол тартты.
«Нұр-Мүбарак» университетінің баспасөз қызметі
