Пластикалық опрация харам ба? Операци жасатудың өлшемдері қандай?
Қазіргі таңда пластикалық операциялар көбіне мұрын, жақ, кеуде, бет т.б. секілді адам ағзаларына бағытталған. Олардың бірқатары тәндегі туа бітті немесе кейіннен ағзада пайда болған түрлі кемшіліктерді жоюды көздесе, бірқатары тек қана әдемі көріну мақсатында жасалады. Діни тұрғыдан пластикалық оперциялар жасатуға тыйым салынудың астарында мынадай себептер бар:
Адамның Хақ тағала сауп-сау етіп сыйға тартқан ағзаларға шүкіршілік етудің орнына, жаратылысын ұнатпай, өзін әдемі етіп көрсетуге тырысу, қазіргі таңда адамның тәндік рахатын ғана негізге алған гедонистік, индивидуалистік түсініктің жемісі. Сондықтан кейінгі кездері әйел-еркек өз тәндерін мінсіз етіп көрсетуге барын салып, қыруар қаржы сарп етіп, тым шектен шығуда. Өкінішке қарай, бұны шектен шығу деп емес, тіпті «өз тәнім өзімдікі, ақшам да жеткілікті, қалағанымды жасауға еріктімін деп» заңды құбылыс ретінде көрсетуге тырысу үрдісі кең етек алуда. Асылында ислам діні дүниедегі игілітердің барлығын адам баласы үшін ұсынғаны ақиқат. Алайда, нығметтің бәрін өзімдікі, қалағанымды жасаймын деп емес, бұлар Алланың берген аманаты, оны қай мақсатта қолданғаныма қарай жауапқа тартыламын деп жауапкершілікпен қарау қажет.
Ислам шариғаты тек қана жақсы көрінуді мақсат еткен пластикалық операцияларға мына тұрғыдан тыйым салады:
- Алланың жаратылысн өзгертуге ұмтылу. Хақ тағала Құранда: «Оларға бұйырамын сосын олар Алланың жаратылысын өзгертеді.. Кімде-кім Алланы тастап шайтанды дос тұтса, күмінсіз, ашықтан-ашық үлкен зиянға батты деген сөз» («Ниса» сүресі, 119) деп бұл істі шайтанның амалына жатқызған. Бухари және Муслимнің хадис жинақтарында Пайғамбарымыздан келіп жеткен бір хадисте де әдемілік мақсатында денесіне сурет салғызған, тістерін егеп, арасын сиреткендер, қастарын тергендер, парик таққандар Алланың жаратылысн өзгертуге талпынғандар ретінде бағамдалып, Жаратқанның рақымынан мақұрым қалатындықтарын баяндаған (Мулим, Либас 119-120; Бухари, Либас, 82). Бұл жерде ешқандай зәрулік жоқ, мақсат тек қана әдемілік болғандықтан мұндай оталарға тыйым салынады.
- Тәнін ауыртып, өзіне азап беру. Пластикалық оперциялар адамды уақытша әдемі еткенімен, уақыт өте келе зияны да шығатындықтан Хақ тағала: «Өз қолдарыңмен өздеріңде қауіп-қатерге итермелемеңдер», – деп бұған тыйым салған («Бақара» сүресі, 195). Иә, қазіргі таңда пластикалық операциялардың зиянды жақтары көптеп көрініс тауап жатқандықтан, адам баласы мұндай оталарға құмартпауы тиіс.
- Ысырап. Әрине мұндай оталарға қыруар қаржы жұмсалады. Алайда, көп адамдар денсаулығы үшін аса зәру оталарды жасатуға қаражат таппай қиналып жүрген кезде, біреу тойып, секіреді, біреу тоңып секіреді демекші, мұндай ырапкершілікке ислам шариғаты тыйым салады.
Пластикалық оталарға мына жағдайларда рұқсат етіледі. Егер адамның бойында туа бітті кемістік, қоян ерін, көзің қитарлығы, құлақ естімеушілік немесе адамның табиғи жаратылысымен үйлеспейтін, қараған кезде көзге оғаш көрінетін, адамға психологиялық тұрғыдан кері әсер ететін ағзадағы кемшіліктер, сонымен қатар кейіннен кейбір кесел нәтижесінде шаштың түсіп қалуы, денеге жаралардың шығуы, жол апаты, күйіп қалу, құлап қалу т.бү секілді жағдайларда туындаған түрлі кемшіліктерді жою мақсатында жасалған оталар Алланың жаратылысн өзгерту мақсатын көздемейтіндіктен оларға рұқсат. Ол емдік мақсатта жасалатындықтан тіпті, қажетті шара болып табылады.
Платикалық операциларға рұқсат етілу үшін мынаш шарттар болу керек:
- Сау жаратылған дене-бітімді өзгерту мақсат болмауы;
- Жасалғаннда адамға пайда тигізетін, жасалмаған жағдайда денсаулығына зиян тигізетін болса;
- Айла, алдау немесе әйелдің еркекке, еркектің әйелге ұқсау мақсаты болмауы;
- Құқықтық тұрғыдан түсніспеушілікке немесе қате түсінуге себеп болмауы.
