28 ақпанда басталған Таяу Шығыстағы әскери қақтығыс аймағынан 4700-ден астам қазақстандық елге қайтарылды. Бұл туралы Сыртқы істер министрлігі мәлімдеді, деп хабарлайды Egemen.kz.
Азаматтарды эвакуациялау резидент және резидент емес әуе компанияларының рейстері арқылы, сондай-ақ жерүсті жолдарымен жүзеге асырылып жатыр.
6 наурызда Қазақстанның шетелдегі дипломатиялық өкілдіктері Ирандағы Zarkuh компаниясында жұмыс істейтін жеті қазақстандықты Иран-Армения шекарасына жеткізуді ұйымдастырды.
Алдын ала мәлімет бойынша, компания тағы 16 қазақстандықты дәл осы бағытпен эвакуациялауды жоспарлап отыр.
Қазіргі уақытқа дейін Ираннан 66 Қазақстан азаматы елге оралған.
Zarkuh компаниясы металл және бейметалл пайдалы қазбаларды барлау және өндіру саласында ғылыми зерттеулер жүргізеді. Олардың қатарында алтын, мыс, қорғасын, мырыш, сирек және бағалы металдар, сондай-ақ құрылыс тасы, отқа төзімді материалдар және цемент өндірісіне арналған шикізат бар. Компания Ирандағы цемент шикізатын барлау және өндіру саласындағы жетекші ұйымдардың бірі саналады.
Айта кетейік, Қазақстанның өңірдегі дипломатиялық өкілдіктері жағдайды үйлестіруді жалғастырып, отандастармен тұрақты байланыста.
Сыртқы істер министрлігі құзырлы органдармен бірлесіп қақтығыс аймағынан қазақстандықтарды қайтару жұмыстарын жалғастырып жатыр.
